Izaskun Gomezek uste du EH Bildu ez dela egon akordiorako prest
EH Bilduk ez du bat egin beste hiru alderdiek hitzartutako 2021eko aurrekontuen itunarekin. Alkateak uste du oposizioko alderdia tematu egin dela.
PSE-EEk, Ahal Dugu-Podemosek eta EAJk bat egin dute 2021eko aurrekontuen itunarekin. 
Gaur goizean bildu da Pasaiako udal gobernua Ahal Dugu-Podemos alderdiarekin, 2021. urteko aurrekontuen ituna sinatzeko. EH Bilduk “anbizio gutxikoa” iritzi dio dokumentuari, eta horregatik, aurreko urtean bezala, ez du hitzarmenarekin bat egin.
Izaskun Gomez alkateak gogora ekarri du udal gobernuak ez zuela oposizioko alderdien babesik behar, 2021erako aurrekontua onetsirik baldin baitzuen koalizioa osatzen duten bi taldeen babesarekin: “Dena den, ulertzen dugu herritarrek batasuna eta akordioak nahi dituztela, eta horregatik lau taldetik hiru, gai izan gara bat egiteko”.
Prestutasun eza
Gomezek ez du jakin esaten zein izan den oposizioko alderdiaren babes ezerako arrazoia, ausardia falta eta akordioarekiko bertigoa aipatu ditu hipotesi gisa, baina ideia bat argi adierazi du: “Negoziazio batean alde guztiek egon behar dute prest pretentsioak alde batera utzi eta bestearen azalean jartzeko. Norbait negoziazio batera baldin badoa hamarra bilatuz, eta jarraitu eta tematzen bada hamarrarekin, oso zaila da adostea. EH Bilduren kasuan, hamarrarekin hasi ziren, eta hamarrarekin bukatu. Eta hori da ezin egin daitekeena”.
Alkateak EH Bilduri egotzi dio bere hasierako planteamendutik ez mugitu izana, nahiz eta tokiko gobernuak eskaini zuen aldaketak barne hartzeko aukera: “Podemos alderdiari onartu dizkion bezala, haiei berdina eskaini zitzaien”.
Ildo horretan, argi utzi du Gomezek udal gobernua mugitu dela: “Immobilismoaren eredu izan da EH Bildu; eta berriz diot: ahaztu zuten aurrekontua onartuta zuela udal gobernuak. Hiru talde hauek argi utzi dute adostasunera heltzeko gai direla. Oraindik hori demostratu ez duena, legegintzaldi honetan zehar, EH Bildu izan da”.
