PSE-EE, EAJ eta Podemosek 2021eko aurrekontuen ituna sinatu dute
Pasaiako udal gobernuak eta oposizioko alderdiak esker ona adierazi diote elkarri, pandemiak eragindako momentu latz hauetan akordio batera heldu izanagatik.
Ahal Dugu-Podemos alderdiko bozeramailea, Julen Rodriguez, eta Izaskun Gomez, alkatea. 
Gaur goizean sinatu dute Arizabalo jauregian Pasaiako PSE-EE, EAJ eta Ahal Dugu-Podemos alderdiek 2021eko aurrekontuen gainean adostutako ituna. Izaskun Gomez alkateak nabarmendu du 2021. urterako prestatutako aurrekontuak izaera nagusiki soziala duela.
Aurreko urtean onetsitako aurrekontu planarekin gertatu bezala, udal gobernua eta Ahal Dugu-Podemos izan dira proposamenarekin bat egin dutenak, ez, aldiz, oposizioko EH Bildu alderdia. Azken horiek hainbat arrazoi argitara atera zituzten aste hasieran, aurrekontuari aurkako bozka zergatik emango zioten azalduz.
Gaur onetsitako aurrekontu-hitzarmenak honako zifra hauek barne hartu ditu, besteak beste:
- 3.000 gehiago kirol entitateentzako laguntzetan.
- 1.500 euro gehiago Sahararen aldeko elkartasun proiektuak gauzatzeko.
- 3.000 euro gehiago hezkuntza publikoaren alde.
- 25.000 euro gehiago gazteriari lotutako jardueretan.
- 30.000 euro udaltzaingoarentzako ibilgailu hibrido berria erosteko
Eta honako konpromisoak jaso dira dokumentuan:
- Udal gobernuaren konpromisoa laguntza lerro bat martxan jartzeko merkataritza eta ostalaritzaren alde, egoeraren eboluzioaren baitan.
- Ahal Dugu-Podemosek Gipuzkoako Foru Aldundiko Antolakuntza Sailarekin duen hitzarmenean 50.000 euroko inbertsioa egiteko proposamena onartzea.
- Urri aldera, Foru Funtsaren zenbatekoa adosten denean, udal gobernuak diru horren erabilera gainontzeko alderdiekin adosteko konpromisoa, baldin eta zenbateko horrek hasiera batean aurreikusitako kopurua gainditzen badu (Pasaiak jaso beharreko partidaren aurreikuspena 10.850.000 eurokoa da, eta horietatik 10.200.000 euro esleitu dira aurrekontuan. Beraz, aurreikuspena betez gero, gainerako 650.000 euroen xedea udalbatzarekin adostu beharko da).
Alkateak bere mintzaldiari amaiera eman dio Ahal Dugu taldeari esker ona adieraziz, hurrengo urteko aurrekontuei dagokienez benetako gogoa, interesa eta enpatia erakutsi izanagatik akordio batera heltzeko. Lore Suarez eta Nahikari Otermin bozeramaileek bat egin dute esker on horrekin.
Julen Rodriguez moreen bozeramaileak tonu berean erantzun du, esanez akordio berriarekin Koronabirusaren ondorio latzei aurre egin ahalko zaiela herritarren mesederako: “Laguntza emateko, ezberdinen arteko zubiak eraikitzeko eta akordioak lortzeko unea da, herritarren arazoei eta eskaerei irtenbidea emateko”.
