Demokraziaren alde egitera deitu dute eragile sozial, politiko eta sindikalek
Bihar, larunbata, 13:00etan elkarretaratzera deitu dute Bilgune Feminista, Oreretako Asanblada Feminista, Sare, Gure Esku, LAB, ELA, CCOO, ESK, Steilas, Ernai, Podemos, Ezker Anitza-IU, PCE/EPK eta EH Bilduk, 13:00etan Udaletxearen aurrean.
Bateragune auziaren barruan zigortutako bost lagunak berriro epaitzeko Espainiako Auzitegi Gorenak hartutako erabakiaren aurrean agerraldia egin dute gaur Errenteria-Oreretako Eragile sozial, sindikal eta politiko nagusiek. Herriko Plazan bildu dira, 12:00etan eta demokrazia hitza osatzen zuten hizki erraldoiak lehen lerroan jarrita, kezkatuta azaldu dira, “oinarrizko eskubide demokratikoen aurkako erasoa dela ulertzen den neurrian”.
Erabakiaren larritasunak, hausnarketa bateratua eta kolektiboa eragin duela Araba, Bizkai eta Gipuzkoako, Nafarroako eta Ipar Euskal Herriko alderdi politiko, sindikatu eta eragile sozialen artean esan dute bildutakoek, eta erabaki judizial horri erantzun irmo eta zeharkakoa emateko konpromisoa azaldu. Horrekin lotuta, bihar, larunbata, 13:00etan elkarretaratzera deitu dute Bilgune Feminista, Oreretako Asanblada Feminista, Sare, Gure Esku, LAB, ELA, CCOO, ESK, Steilas, Ernai, Podemos, Ezker Anitza-IU, PCE/EPK eta EH Bilduk, 13:00etan Udaletxearen aurrean, Demokrazia lemapean, eta herritarrak parte hartzera deitu dituzte.