COVID egoerara egokituta dator Gabon Abesti Sariketa
Ez da ohikoa izango, baina ez du hutsik egingo. Ereintza Elkarteak eta Gipuzkoako Abesbatzen Elkarteak antolatuta, Gabon Abesti Sariketa birtuala egingo dute aurten, bere 74. urteurrenean.
Orereta abesbatza gabon kanta lehiaketan. Argazkia: Carrera Ez da ohikoa izango, baina ez du hutsik egingo. Ereintza Elkarteak eta Gipuzkoako Abesbatzen Elkarteak antolatuta, Gabon Abesti Sariketa birtuala egingo dute aurten, bere 74. urteurrenean. Egitarau berezia antolatzeko asmoa zuten 2021eko ekitaldiari begira, aurre ospakizunetan hasteko, baina pandemiak ez du ahalbidetuko. Donostiako Koldo Mitxelena Kulturgunean aurkeztu dute txapelketa eta bertan eman dituzte berezia izango den aurtengo ekitaldiaren xehetasunak.
Gabon kantak presente izan behar zutela erabaki dute antolatzaileek, “inoiz baino gehiago” eta horri begira, modu batean edo bestean parte hartzeko aukera eskaini dute, banaka zein taldeka.
Gabon Sustraiak leloarekin Gipzukoako Abesbatzen Federazioan inskribatuta dauden haur eta gazte abesbatzentzat deitu dute. Udalerri bateko berezko gabon kantak abestu beharko dituzte online, hau da, udalerri horretatik kanpo oro har ezagunak ez direnak. Helburua melodia zaharrak berreskuratu eta gabon kanten bilduman sartzea da, horregatik aurtengo leloa. Abesbatza parte hartzaileek bideo bat grabatu beharko dute, eta ezarrietako sarietako bat, 600, 500 eta 400 eurokoak irabazteko aukera izango dute. Irabazleak hilaren 26an ezagutaraziko dituzte, 18:00etan, sare sozialen bidez.
Baina nola aurkitu garai bateko gabon abesti horietako bat? Antolatzaileek eman dute erantzuna: “Altxor hori bilatzeko modurik egokiena, herriko adinekoei, aiton-amonei galdetzea da. Ziur denon artean benetako bitxiak aurkitzen ditugula”. Sariketaren atal honetan ez dutela interpretazioa baloratuko esan dute antolatzaileek, gainera, “ez da baloratuko nola abesten den, baizik eta zer”.
Helduei dagokionean berriz, hiru bideo parte hartzaile proposatu ditu antolakuntzak: norberak bere burua grabatuko du kantari, eta ondoren muntaia egingo dute antolatzaileek. Honakoak aukeran utzi dituzten hiru bideoak: Olentzerorena, Hator Hator bideoa, eta Mesias Sarritan Jazz bideoa. Hiru bideoak, hilaren 24an zabalduko dituzte antolatzaileek, 18:00etan sare sozialen bidez..
Errenteriako Gabon Kanta Sariketa, Euskal Herrian egiten den zaharrenena da, eta Gipuzkoan, Gabonetako musika koralaren erreferentziatzat jo daiteke. Lehiaketaren helburua, herria, Gabon musikarekin girotzea da, kantu koralaren bitartez.
