'12cm' erakusketak mende laurdena beteko du aurten
Parte hartzaileen obrak ikusgai izango dira hilaren 26tik aurrera, San Pedroko Udal Aretoan. Asteartetik larunbatera egongo da zabalik.
Martxan da 12cm erakusketa, eta aurtengoa ediziorik bereziena izango da, ez soilik Koronabirusagatik, izan ere, aurten mende laurdena beteko baitu iniziatibak. Ikusgai izango da hilaren 26tik aurrera, honako ordutegian:
- Asteartetik larunbatera, 18:30etik 20:30era.
- Igandeak eta jai egunak, 11:30etik 13:30era.
- Hilaren 31ean eta urtarrilaren 1ean nahiz 6ean itxita izango da.
Erakusketak argi izpi izan asmo du egun ilun hauetan. Ildo horretan, 12cm berezi egiten duen ezaugarrietako bat azpimarratu nahi izan dute antolatzaileek: erakusketaren izaera kolektiboa, non 200 artista baino gehiagok beren formatu txikiko artelanak aurkezten dituzten.
Aurreko edizioetan bezala, obrak Pasai San Pedroko Udal Aretoan (Morales Oliver plaza, 3), Hendaian eta Arguedasen egongo dira 2021eko apirilera arte, eta ohi bezala, formatu txikiko obrak baina kalitate handikoak izango dira ikusgai: pintura, eskultura, argazkigintza, serigrafia, bideoa eta teknika mistoak, besteak beste.