Garai gorabeheratsuko aurrekontua onartu dute, aho batez
Egoeraren segurtasun ezak baldintzatutako aurrekontuak onartu dituzte. Ia 18 milioi eurokoak izango dira, aurtengoa baino %1,8 gehiago.
EAJko zinegotziek aldeko botoa eman zieten aurrekontuei. Oiartzungo Udalak 2021erako aurrekontua du. Aho batez onartu dute, gainera. 17.981.459 euroko aurrekontua izango da, 2020koa baino %1,8 gehiago. Bizitzaren alor guztiak bezala, covid-19ak markatutakoa izango da.
Jon del Olmo Ogasun zinegotziak aurrekontuen osatzea prozesuaren berri eman zuen. Adierazi zuenez, ekainean hasi ziren aurreikuspenekin, eta irailean egin zuten lehenengo zirriborroa. Bigarrena, berriz, azaroan osatu zuten. Normalean hilabete horretan onartzen dira aurrekontuak.
Pandemiak aldatu du joera. “Urte berezia izan da aurtengoa, eta ahalik aldaketa eta aurreikuspen zehatzenak aurkeztu nahi genituen. Horregatik aurkeztu dira berandu”, jakinarazi zuen Del Olmok.
Aurrekontua diseinatzerakoan, hainbat aldagai hartu dituzte kontuan: zorpetzeko ahalmena handitu dela, auzo batzarretako eskariak eta oposizioaren ekarpenak.
Aurrekontua, aletuta
Del Olmok adierazi zuenez, aurrekontuaren %15 inbertsioetara bideratuko da; 2.700.000 euro inguru. Horietatik 1.600.000 euro Mendiburu 14rako izango dira, beste 600.000 Altzibar eraberritzeko —lehentasuna duela uste du gobernu taldeak— eta milioi erdi ohiko mantenu lanetarako.
Foru Funtsatik jasoko duten diru partidaren aurreikuspenari dagokionez, %8-10 inguru izango dela iradoki zuen Del Olmok. “Aurtengo partidak gorabeheratsuak izan dira. Hala ere, gure zergetan igoera txiki batzuk izango ditugu”, gaineratu du.
Esan zuenez, orain da gizarte zerbitzuetara zein inbertsioetara partidak bideratzeko unea.
Horrez gain, aurrekontuaren %31 eguneroko udal zerbitzuak finantzatzeko izango da. Beste kopuru handia diru laguntzetarako izango da: %18. Bertan diru-laguntza poltsa dago aurreikusita, Covid-19aren balizko kalteei aurre egiteko.
EH Bilduk zein EAJk aldeko botoa eman zuten. Janire Mitxelena jeltzaleak azaldu zuenez, aurrekontuetako gauza batzuk gogoko ez dituzten arren, Bai-aren alde egin zuten. Bi arrazoirengatik: lehena, beren ekarpenak kontuan hartu direlako; bigarrena, garai zailetan denek elkarrekin aurrera egitea lehenesten dutelako.
Diru laguntzen bigarren deialdia
Plenoko beste puntu garrantzitsuena diru laguntzen bigarren deialdiari dagokiona izan zen. Lehenengo deialdian, martxo eta ekaina bitarteko enpresen itxierari zegokiona, 95.000 eurokoa izan zen.
Oraingoa 50.000 eurokoa izango da. Batez ere ostalaritzari laguntzeko erabiliko dela nabarmendu zuen Del Olmok. Urtarrilaren 7tik 22ra eskatu beharko dira laguntza horiek. Kasu honetan ere, aho batez onartu zuten.
Gainontzeko puntuetan ere adostasuna egon zen. Honakoa da gai zerrenda.
