Errege Magoek ere harrera egingo diete haurrei
Hilaren 26an zabalduko dute hitzorduak hartzeko epea, Kultur Malutak web orrian egin behar da.
Errege desfilea, Errenteria-Oreretan. Olentzero eta Mari Domingik harrera egingo diete gaur eta bihar Errenteria-Oreretako haurrei, beraiekin hitz egin, argazkia egin eta desio dituzten opariak eskatzeko aukera izango dute, horretarako aurretik hitzordua eskatu badute, bederen. Esan moduan, gaur eta bihar izango da hori. Ondoren lekukoa emango diete Errege Magoei.
Errege desfilea ere ez da posible izango urtarrilaren 5ean, baina kasu horretan ere, haurrek euren gutuna eman, eta argazkia egiteko aukera izango dute. Horretarako txanda hartu beharko da aldez aurretik, eta ikusita Olentzero eta Mari Domingik izan duten arrakasta eta berehala agortu direla hitzorduak, adi ibiltzea komeni da. Hilaren 26an zabalduko dute hitzorduak hartzeko epea, Kultur Malutak web orrian egin behar da. Olentzero eta Mari Domingik egingo duten puntu beretan izango dira Errege Magoek haurrei egingo dizkieten harrerak: Merkatuzar, eta Fanderia eta Beraungo frontoietan.
