Onintza Etxebestek eta Irati Mogollonek 'Uhinak' beka bana lortu dute
Iratzar fundazioaren bekak jasoko dituzte. Mogollonek Covid-19a eta lan baldintzak ikertuko ditu; Etxebestek, euskal identitatean arteak duen pisua.
Uhinak bekaren onuradunak. Etxebeste eta Mogollon, aurrean [Argazkia: @IratzarFundaz]. Iratzar eta Ipar Hegoa Fundazioek atzo eman zuten Uhinak beken onuradunen berri. Oarsoaldeko bi ikerlarik lortu dituzte bekak: Irati Mogollon Garcia lezoarrak eta Onintza Etxebeste Liras oiartzuarrak.
Covid-19ak lan baldintzetan sortutako aldaketa sakonak ikertuko ditu Mogollonek, eta nola eragiten ari diren horiek, “kapitalismo digitala” deritzonaren aroan. Sakelako telefonoaren erabilera, etxeko lana, bilera digitalak… sortzen ari diren agertoki berriak aztertuko ditu, eta Euskal Herrian zein eragina duten.
Mogollonek azaldu du, bideo batean: “Komunitate gisara, alternatibak hausnartzen hasi, eta kapitalismo digital eta kapitalismo emozional horien arteko nahasketa horren aurrean herri gisa konprometitzen hasteko proposamena da”. Sindikalgintza eraberritzeko gakoak emango ditu.
Etxebestek, bere aldetik, proposamena euskal identitatea ekoizten duten formuletan oinarritu nahi du. “Euskal identitateak askotan etengabeko erreferentzialtasunetan kokatzen da, eta arteak badu azpiegitura horiek arriskuan jartzeko edo indar berezi bat egiteko”, esan du.
Batez ere, arte garaikidean lanean ari diren artista edo kolektiboen gaitasuna arakatuko ditu Etxebestek, kultura hori “performatzeko, mobilizatzeko eta kritikara irekitzeko”.
Iratzar eta Ipar Hegoa fundazioek jakinarazi dutenez, egileek sei hilabete izango dituzte beren lanak egiteko. Lana publikatzeaz gain, 500 euroko diru saria ere jasoko dute. Etxebeste eta Mogollonekin batera, beste lau beka onuradun daude.
