Pandemiak 'motxiladun umeen' egoera gogortu duela ohartarazi dute
Euskal Herrian 86 ume daude gurasoetako bat edo biak kartzelan dituztenak. Oiartzunen bi dira; lautan bakarrik egon dira aitarekin.
Agerraldi jendetsua egin zuten larunbatean. Larunbat eguerdian, Oiartzungo Sarek deituta, agerraldi jendetsua egin zuten Madalensoron. Motxiladun haurren egoeraren berri ematea zen helburua.
Gogorarazi dutenez, Euskal Herrian 86 ume daude ama, aita edo bi gurasoak espetxean dituztenak. Etxetik urrunduta egoteak harremana zailtzen duela nabarmendu zuten.
Oiartzunen bi dira aita espetxean duten haurrak: Xuhar eta Hize, zazpi eta urtebeteko adinekoak, hurrenez hurren. Aitarekin izan duten harremanak bi motatakoak izan direla esan dute: telefono bidezko dei laburrak; eta aurrez aurreko bisita luzexeagoak.
“Bisita hau hilean behinera mugatu ohi da, bisitatzeko egin beharra dagoen distantziaren ondorioz, asteburu gehiagotan bidea egitea oso zaila eta gogorra delako”, adierazi zuten. Orain dela gutxira arte Herrerako espetxean egon da, Oiartzundik 642 kilometrora, 14 orduko joan-etorriarekin.
Agerraldian nabarmendu zutenez, pandemia arteko harremana jarraitu antzekoa egin dute. 2020an, baina, harremanak okerrera egin du: “Covid-19ari aurre egiteko hartutako neurriak direla-eta, aurrez aurreko bisitak bertan behera gelditu dira, eta honekin batera familia honen harremanetarako funtsezkoa den aurrez aurreko bisitarik gabe egon dira bederatzi hilabetez”.
Martxotik azarora bitartean ezin izan dute aitarekin jolastu ezta besarkatu edo muxurik eman ere. “Urrunketak eta COVID 19-aren aurreko neurriek Xuhar eta Hize umezurtz utzi dituztela ozen aldarrikatu nahi dugu”.
Larunbateko mobilizazioan parte hartzera deitu zuten.
Azaldu dutenez, Hizek urtebete besterik ez du, eta jaio zenetik aita lau aldiz bakarrik ikusi du. Egoera jasanezina dela salatu dute.
Euskal Herrira hurbildu
Abendu hasieran, Joanes Larretxea Herrerako espetxetik Asturiaskora eraman zuten; 392 kilometrora dago. Abenduko azken astean bikotekideak zein semeak berarekin egoteko aukera izan dute, baina Hizek ez. Covid-19aren aurkako neurri gisa, bisitetara ezin dira bi lagun baino gehiago sartu.
“Egoera honek ez du berehala bukatzeko itxurarik eta familia honek bizi duen ziurgabetasuna ikaragarria da. Datorren hilabetean aita ikusteko aukerarik izango al dute? Ama Xuharrekin ala Hizerekin sartuko da? Noiz izango dute berriro familia guztia elkartzeko aukera”, galdetu dute.
Urruntzearekin bukatzea exijitu zuten. Larretxea Euskal Herriko espetxe batera ekartzea eskatu zuten, familiak beste mota bateko harremana eduki dezakeela argi baitutelako.
Presoa euskal herriratzeko bidean, hainbat eragilerekin harremanetan jarriko dira, eta hainbat ekitaldi egingo dituzte aurreratu dute. Egitarau horretan, lehena, datorren larunbatean izango da. Herriko auzoetatik zutabeak aterako dira, eta Madalensoron elkartuko dira, 17:30ean. Honakoak izango dira ordutegiak:
- Altzibar: 16:00etan, Altzibarko plazan.
- Arragua: 17:00etan, Mendinen.
- Ergoien: 17:15ean, albaitaritza zentroko aparkalekuan.
- Gurutze: 17:00etan, Mendintxeberrin.
- Iturriotz: 16:00etan, Iturriozko frontoian.
- Karrika: 16:30ean, Karrikako plazan.
- Ugaldetxo: 17:00etan, futbol zelaian.
