Tokikoa eta kalitatezkoa bermatzeko, deskantsu gabe lanean
Lehen sektoreko tokiko ekoizleei eta haien produktuei balioa emateko kanpaina abiatu du udalak. Askotariko eta kalitatezko eskaintza bermatzen dute, eta tokiko ekonomia eta ingurumena bizirik mantendu.
Lehen sektoreko ekoizleak ezagutarazi eta beraien produktuak herritarrengana hurbiltzeko kanpaina abiatu du udalak, Bizi Errenteria programaren barruan. Errenteriako uzta aterkipean, udalerrian lanean ari diren hamalau ekoizleen eta haien produktuen gaineko informazioa zabaltzea du xede, egiten duten lana aitortuta.
Kanpaina oso ondo baloratu du Aparola Zarra baserriko Gema Olasagarre Kamiok: «Pandemiarekin asko okertu da egoera, azokarik ez denez egin, ezer saldu gabe izan gara martxoaz geroztik, ez da Sagardo Egunik egin, urriko azokarik, San Tomas egunik…». Barazkiak ekoizten ditu Olasagarrek. Dirua herrian gelditzeko modu bat da tokiko ekoizleen produktuak kontsumitzea, bere ustez.
Gazta, ardi esnea eta arkumeekin ari da Eguzki Borda baserriko Josu Oiartzabal Zapirain. Kanpaina ongi baloratu du, baina halakoak beti egin beharko liratekeela uste du, ekoizleen lana eta produktuak erakutsi, eta gertukoa kontsumitzearen gainean «kontzientzia sortzeko». Kalitatezko produktuak eskaintzeaz gain, ingurumenaren zaintza ere kontuan hartzen dutela dio, «0 Km filosofiarekin bete betean egiten dugu bat, eta ingurumena eta paisaia zaintzen ditugu».
Oinarrizkoa bada ere, lehen sektorea «bazterrean» utzi izana salatu du, eta herriaren errealitateari erreparatu dio: «Hainbeste mila biztanle izanik hamalau ekoizle baino ez izatea, tristea da». Belaunaldi arteko erreleboa bermatzea ezinbestekotzat jo du.
Hamalau ekoizleen eskaintza osoa hemen kontsulta daiteke.
