5G teknologiaren gaineko moratoria eskatu du Eguzkik
Moratoria ezinbestekoa dela uste du Eguzkik, "osasunaren gaineko ondorioei buruz dauden susmoez gain, beste arrisku mota batzuk gehitu dituztelako ere".
Etsituta. Hala azaldu da Eguzki talde ekologista 5 G teknologiaren gainean aurkeztu zuen mozioa plenoan aztertu ondoren. Azaroan landu zuen gaia udalbatzak, irailean aurkeztu bazuten ere, bitan atzeratu ostean. Teknologia horrek gizaretaren hainbat sektoretan alarma piztu duela esan du Eguzkik, “bereziki kolektibo ahulenen artean. Uhin elektromagnetikoen maiztasuna igo egingo dute, eta herritarrak, horien eraginpean izango gara ia etengabe”.
Talde politikoen jarrera gaia ztertzeko unean etsigarritzat jo du talde ekologistak, “teknologia horren gaineko moratoria eskatu zuen Eguzkik, azterlan independenteek teknologia horrek osasunean eraginik izango ez duen ebidentzia zientifiko nahikoa izan arte: “Aldeko botorik ez da izan. Teknologia horrek izan ditzakeen eraginak herritarrek frogatu behar dituztela defendatu zutenei esan behar diegu gauzen ordena modu interesatuan aldatzen ari direla, jakin badakitelako, enpresen ardura dela sortzen edo lantzen dituzten horiek ez direla arriskutsuak”.
Osasunean izango duen eraginaz gain, bestelako arriskuak aipatu zituztenei berriz, zuhurtasun printzipioa ezarrita taldearen eskaerak garrantzia handiagoa hartzen duela nabarmendu du Eguzkik. Etsipena bikoitza izan duela dio taldeak, “duela hiru hilabete aurkeztutako mozioa ez bozkatzen zergatik saiatu zen udala ez dakigu oraindik, baina herritarren eskubideak murriztea suposatzen du”.
Moratoria ezinbestekoa dela uste du Eguzkik, “osasunaren gaineko ondorioei buruz dauden susmoez gain, beste arrisku mota batzuk gehitu dituztelako ere”.
