Izaskun Gomez: "Ezingo genuke Antxo itxi, nahiko bagenu ere"
Egoera epidemiologikoa aztertzeko bildu da Larrialdi Taldea. Eremu gorrian sartuz gero, murriztapenak udalerri osoan ezarriko lirateke ostiraletik aurrera.
Ostirala baino lehen Pasaia eremu gorrian sartuko balitz, ostalaritza guztiz itxi beharko lukete. 
Gaur goizean bildu da Pasaiako Larrialdi Taldea alkate den Izaskun Gomez eta udalbatzako bozeramaileekin, Pasaiako egoera epidemiologikoa aztertzeko. Antxo da, alde handiz, udalerria osatzen duten barrutien artean tasarik altuena duena -eta gorriz markatuta dagoen bakarra-, eta beraz, herriko datu orokorrak puzten dituena. Egoera horren gainean hausnartzeko eta hartu beharreko aparteko neurriak -egotekotan- aztertzeko egin dute udaletxean urgentziazko bilera.
Alkate den Izaskun Gomezek argitu du erabaki guztiak udalerrika hartu behar direla, eta inoiz ere ez barrutika: “Ezingo genuke Antxo itxi nahiko bagenu ere; dekretuak dio udalerrika ezarri behar direla neurriak”.
Pasaiako tasa ez da oraindik gorrira iritsi, atzo -astelehena- lau positibo hauteman ziren udalerrian eta azken datu horiekin tasa 490,37an dago orain -eremu gorrian sartzeko langa 500ean dago ezarrita-; dena den, azken egunetako bilakaera kontuan izanik, litekeena da astea amaitu aurretik sartzea udalerria gorriz markatutakoen artean, hala uste du alkateak.
Hori hala balitz, Pasaiako Udalak ez du aurreikusi aparteko neurririk hartuko litzakeenik barrutian, baizik eta Eusko Jaurlaritzak 500etik gorako tasa duten eremu guztietarako xehatutako murriztapen orokorrak ezarriko lirateke Pasaia osoan ostiraletik aurrera -egun hura barne-, horien artean udalerritik ateratzeko debekua -lana edo bestelako premiazko kausak ez badira medio- eta ostalaritzaren guztizko itxiera.
Honakoak dira 100.000 biztanleko azken hamabost eguneko kutsatze tasak, osasun eremuka, atzoko datuen arabera:
- Antxo: 711,43 (gorria).
- San Pedro: 357,88 (laranja).
- Lezo-Donibane: 268, 88 (horia).
