2021eko tasetan eta zergetan hobari eta salbuespenak eska daitezke
Otsailaren 28ra arte egin daitezke eskaerak. Hobari eta salbuespenak egikaritzeko baldintzen berri eman du Oiartzungo Udalak.
Udalaren tasa eta zergetan hobari edota salbuespenak eskatzeko epea irekita dago. Otsailaren 28ra arte egin daiteke eskaera, udaletxeko harreran edo online. Data kontuan hartzeko eskatu du udalak, egun hori pasatuta egindako eskaerak 2022ra aplikatuko baitira.
Oiartzungo Udalak hobarien baldintzen berri eman du:
- Ondasun Higiezinen zergan hobaria eskatzeko aukera izango dute familia ugariek (%50-90), BOE etxebizitzek lehen hiru urteetan (%50) eta eguzki energiaren aprobetxamendu termiko-elektrikoak dituztenek (%50).
- Jarduera Ekonomikoen Zergan hobaria izango dute industria jarduera gune jendetsuetatik industrialdeetara eramaten dutenek (%30), enplegua sustatzeagatik (%20) eta langileentzako garraio plana ezartzen duten enpresek (%50).
- Trakzio mekanikoko Ibilgailuen zergan hobaria izango dute 30 urte baino gehiagoko ibilgailu historikoek (%90); ibilgailu elektriko eta hibridoek (%25); eta familia ugariek (%90).
- Eraikuntza, instalazio eta obren gaineko zergan hobaria eskatu dezakete interes bereziko edo udal onurako eraikuntza, instalazio eta obrak direnek (%95 arte); ASAP programaren barruan dauden etxebizitzek (%95); eguzki energiaren aprobetxamendu termiko-elektrikoak dituztenek (%95) eta, irisgarritasuna eta bizigarritasuna errazten duten eraikuntza eta instalazio obrek (%90).
- Hiri-lurren balio-gehikuntzaren zergan hobaria emango da senitartekoen eskualdaketetan, heriotza dela eta (%90).
- Hondakinen tasan ere hobariak ematen ditu Udalak: autokonposta egiten dutenei (%20); aportazio guneetara eramaten dutenei (%10); arrandegiei edo hondakinak gestore pribatuekin kudeatzen dutenei (%50); eta animalia-jatorriko azpiproduktuak egoki kudeatu eta organikorik sortzen ez dutenei (%20).
- Etxez etxeko laguntza zerbitzuaren prezio publikoetan ere hobariak izango dira (%98,5 arte).
Salbuespenak, berriz, kasu hauek betetzen dituzten herritarrek eska ditzakete: ibilgailuen gaineko zergan, nekazaritza ibilgailuentzako eta mugikortasun mugatua duten pertsonek.
Ur hornidura eta estolderiaren tasan zein hondakinenean, gutxieneko soldata baino diru-sarrera txikiagoak dituztenek salbuespena izango dute.
Gainkarguak
Etxebizitza hutsak betetzeko politika sustatzeko asmoz, udalak ohiko bizileku ez diren etxebizitzei %75eko gainkargua ezartzen die Ondasun Higiezinen Zergan.
Etxebizitza horien jabeek ere epe honetan eskatu beharko dute gainkargua ez aplikatzeko eskaera, ohiko bizileku direla frogatuz.
