Herriaren eta euskararen alde egindako lana aitortu dio udalak Lizeoari
Pasaiako udalbatzako alderdi guztiek aho batez onetsitako hitzarmena sinatu dute Pasaia Lezo Lizeoko zuzendariak eta herriko alkateak.
Edurne Urkiola, Pasaia Lezo Lizeoko zuzendaria; Izaskun Gomez, Pasaiako alkatea; eta Andrea Palomares, Kultura Saileko zinegotzia. 
Pasaia-Lezo Lizeoko zuzendari Edurne Urkiolak eta herriko alkate Izaskun Gomezek bi instituzioen arteko elkarlanaren bermea jasotzen duen hitzarmena sinatu dute. Joan den hil amaieran udalbatza osatzen duten alderdi politiko guztiek aho batez onartu zuten ikastetxearekin elkarlanean aritzeko akordioa. Lankidetza plan berriak —lau urteko iraupena du— 2001. urtean sinatutako akordioa du oinarri.
Ikastolako zuzendariak nabarmendu du zentroarentzat bereziki pozgarria dela talde politiko guztien adostasuna, eta horiek aintzatetsi izana Lizeoak herritik eta herriarentzat egiten duen lanaren izaera publikoa: “Ikastolak herriarekin daukan harremana islatzen du sinatzeak. Azkenean, Lizeoa hasieratik dago herriari oso lotuta eta hitzarmenak, lehengoa eta oraingoa, horren isla dira”.
Bi aldeen arteko elkarlana egunerokoa dela aitortu du Urkiolak: “Oso presente dago ikastola udal bizitza horretan”, eta aurrerantzean lotura horiek irmotzeko gogoa adierazi du. Aurtengo paktuak udalak egiten duen guztizko ekarpenean galera bat sufritu badu ere, ikastetxeko arduraduna ulerkor agertu da murriztearen aurrean, horrek zerikusia izan dezakeelakoan egun nagusi den krisiarekin. Dena den, eguneroko harremanari eutsi eta, aukera denean, ekarpena lehengoratu dadin lanean jarraitzeko konpromisoa azaldu du.
