[Bideoa] Ijurkon, botoiari eman eta gora
Ijurko auzoko Aralar eta Auñamendi kaleak batzen dituen igogailua martxan dago jada. Auzokideek eskatutako irisgarritasun azpiegitura da.
Alderdi politiko guztietako kideek parte hartu dute inaugurazio ekitaldian. Botoiari eman, eta gora. Ijurko auzoko bizilagunen eskaera gaur egikaritu da: Aralar kaletik Auñamendira joateko igogailua martxan da. Urtarrilaren bukaerarako agindu zuen udalak Ijurkokoa igogailua prest egongo zela, eta hala izan da. Kaleko bigarrena da Lezon, baina ez da azkena izango. Altamirara iristeko bigarrena (lehena Bekoerrota kiroldegiaren eta Altzate igerilekuaren artekoa da, 2019tik dago martxan) dute buruan udal agintariek.
Gaur inauguratu dute Ijurkokoa, euripean. Jesus Mari Martiarena alkateak moztu du zinta gorria, eta ondoren hura izan da azpiegitura probatzen lehena. Dena ondo. Ezustekorik ez. Harekin batera beste hainbat udal gobernukide, eta EH Bilduko zinegotziak izan dira ekitaldian. Eusko Jaurlaritzatik ordezkaritza iritsi da Lezora aldi berean: Pablo Garcia Etxebizitza zuzendaria. Denak pozik. Alta, herritar xumeen artetik, igogailua erabili duen lehena Manuel Garbizu herritarra izan da: ez du dudarik izan, azpiegitura berriarekin fio zen. ‘2’ botoia sakatu, eta Auñamendi kaleko pasabidean zen aitaren batean. Hura ere pozik.
Izan ere, bi geldialdi ditu aszensoreak. Lehena Auñamendi kaleko 5, 7 eta 9 atariek duten terraza publikoan dagoena da, eta bigarrena kale horretako 9. zenbakiaren goialdean dagoena. 2020ko irailean hasi zituzten lanak, gaur arte.
Gobernu taldetik esan dutenez, euren asmoa da irisgarritasuna hobetzearen alde lan egitea, “Lezon bizi diren herritarren bizi kalitatearen, mugikortasunaren eta ongizatearen mesedetan”.
Alkatea, inaugurazioko zinta mozten.
asdasdasdasdasd
