Ez dute geldirik egoteko inolako asmorik
Asteartero, hainbat lezoar Koldobike Gezala pilotalekuan biltzen dira ariketa fisikoa egitera. Gorputza aktibo mantentzeaz gain, sozializaziorako tresna ere badira saio horiek.
Lezoko Udalaren Muittu Lezo estrategiaren barruan, asteartero herritar talde bat Koldobike Gezala pilotalekuan biltzen da ariketa fisikoa egiteko. Adinekoak dira ia denak. Horri, ostegunetako Tipi-topa ibilbideen egitasmoa erantsi behar zaio. Mugitzea bizitza da, gozatu! da estrategiaren leloa. Bete-betean bat egiten du esaldi horrek egitasmoaren filosofiarekin, nahiz errealitatearekin.
Astearteko saioan izan zen HITZA. Hasi aurretik nabaria zen partaideen arteko giro ona, konfiantzazkoa, alaia. Sanoa. Izan ere, egitasmoaren helburuetako bat da, ariketa fisikoa egiteaz gain, adinekoei batez ere etxetik irteteko aukera bat ematea, herritarrekin elkar eragiteko, eta sozializazioan sakontzeko. COVID-19aren garaian, askok, isolamenduarekin hausteko erabili dituzte talde saioak. Hartara, birusa ez hedatzeko beharrezkoak diren neurri guzti-guztiak hartzen dituzte saio horietan.
Jon Amiama Jauregi da astearteetako jarduera horien gidari. Herriko kirol orientatzailea da. «Herritar aktiboak izatea da gure helburua, eta hori era integralean egitea da asmoa. Gaitasun fisiko ezberdinen lanketan oinarritzen dira Martxan-en saioak —pilotalekuko saioen izena da—. Ariketak material erraz eta etxekoekin egiten ditugu, herritarrak ahalduntzeko, gero euren kabuz etxean egin ditzaten.
Egunerokotasuneko zereginetan autonomia lortzen dute horrela». Orientatzailea jarduera fisikoa egin nahi dutenen bidelaguna da. Talde saioak gidatzeaz gain, norbanakoen egoerak aztertzeko prest dago doako zerbitzuan, herritarren aukera, nahi, desio eta beharretara egokitutako baliabideak emanez eta proposamenak landuz, Lezon egitekoak edo eskualde izaerakoak. 663 22 80 31era deitzea bestetik ez dago zerbitzuen berri izateko.
Pozik daude
Lurdes Arrizabalaga Martxan-eko saioetara gustura doa. Aktibo dago. «Adin batekoa naiz, eta gorputzarentzat onuragarriak eta eramangarriak dira bertan egiten ditugun ariketak, politak. Denak ezagunak gara gainera, Lezokoak. Oso giro ona sortzen da». Ostegunetako Tipi-tapan ere parte hartzen du Arrizabalagak. Caritaseko kide da, eta parte hartzeko eskatu zieten Lezoko taldeko kideei. Bat egin zuten.
Uste berekoa da Maria Salaberria. Gorputza zaindu nahi du, eta pozik dago hori egiteko ohitura bere egin duelako. «Etxeko armairuan altueran dauden gauzak errazago hartzen ditut orain. Besoak hobeto ditut. Tipi-topan ere aritzen naiz, gustura. Monitore dotore honekin, gainera, oso pozik gaude», dio.
