Guraso gara!, euskararen transmisioaren garrantzia gogorarazteko gida
Euskararen transmisioak zein harekiko jarrera proaktiboa izateak duten garrantzia jaso dute bi euskarritan: esku orria jaioberrien gurasoentzat, eta bideoa, familientzako.
Ostolaza eta Osa, eskuorriekin. Oarsoaldeko Euskara Batzordeak euskararen transmisioari eta hizkuntzarekiko jarrera positiboa izateari garrantzia handia ematen dio. Horregatik, familiei zuzendutako bi euskarri berritu eta aurkeztu ditu.
Alde batetik, jaioberrien gurasoentzako gida bat osatu dute. Bestetik, familientzako bideo bat prestatu dute, eta Oarsoarrak-en webgunean ikus daiteke. Oarsoaldeko antzerki eskoletako kideek egin dute. Bien helburua familiei euskararekiko jokabideetan sakontzea laguntzea da.
Itziar Ostolaza Errenteria-Oreretako zinegotziak gurasoei eskatu die, matrikulazioa egiteko garaian, euskara hutsezko ereduaren alde egiteko. Hizkuntza ohituren aldetik familien artean aniztasuna dagoela onartu du Ostolazak, eta gidak kasuan kasuko argibideak ematen dizkie guraso euskaldunak, erdaldunak edo bata eta bestea dituzten familiei.
Horrela, euskaraz ez dakiten gurasoek hizkuntzaren alde asko egin dezaketela nabarmendu du Ostolazak: jarrera proaktiboa izateko gonbita luzatu die.
Esku orria, erregistroan
Loreto Osa Pasaiako zinegotziak azaldu duenez, haurra jaio ondoren udal erregistrora joaten direnean jasoko dute Guraso gara! esku orria. Euskaraz eta elebitan banatuko dute gida hori.
Hautatutako ikastetxean euskaraz matrikulatzeaz gain, eskolaz kanpokoetan berdin egitea animatzen dute. Horrela egin ezin denean, euskarazko kultur kontsumoa euskaraz izateko deia egin du Osak.
Bideoari dagokionez, ikasturte hasierako bileretan aurkeztuko dizkiete gurasoei, baita hezkuntza zentroek egoki ikusten duten momentu eta egoeretan. “Erabilgarria eta, batez ere, eragingarria izatea nahiko genuke”, adierazi dute.
Oarsoaldea Garapen Agentziako Euskara Saileko arduradunaren arabera, askotan uste da hizkuntza bakarrik transmititzen dela. “Jarrerak ere bere pisua du transmisioan. Euskaraz ez dakiten gurasoek ere transmititu dezakete, jarrera positiboa edukita”, gaineratu du Agirretxek.
