Proiektu "suntsitzaileei" aurre egitera deitu dute, berandu baino lehen
Larunbatean elkarretaratzeak egingo dituzte Errenteria-Oreretan, Lezon eta Oiartzunen, U30 Aldaketaldia iniziatibaren barruan.
Gaurko agerraldiaren irudi bat. AHT, Amazonen Oiartzungo logistika gune berria, Zaldibarko zabortegia, klima aldaketa… guzti horien nahasketak koktel arriskutsua sortzen duela salatu dute gaur Oarsoaldeko hainbat talde eta eragilek, eta berandu baino lehen erabakiak hartu eta neurriak ezarri behar direla esan, asko, gehiegi dagoelako jokoan. Agerraldia egin dute gaur arratsaldean Xenpelar Etxearen aurre aldean Eguzki, GOT, AHTrik ez, Ekologistak Martxan, Iztieta-Ondartxoko Gurekin auzo elkartea, eta Larreko Mahaia elkarteko ordezkariek U-30 Aldaketaldia ondo bizi eta bizitzen uzteko kanpainaren barruan.
Oarsoaldean dauden proiektu “suntsitzaileak” lehen lerroan jarri dituzte bildutakoek, baita horiek eragindako ondorio larriak ere, “denok kontziente bagara ere, erakundeetatik hartzen diren neurriak ez dira nahikoak, neurri zorrotzagoak behar dira ondorio suntsitzaileak murrizteko; neurri horiek baina, egungo eredu ekonomikoa zalantzan jartzen dute, eta sistema kapitalista aurka azaltzen da”.
Jokoan dago ingurumena, egoera klimatikoa egunetik egunera larriagotzen doan bitartean. Gero eta ohikoagoak dira uholdeak, tenperatura globala igotzen ari da, biztanleriaren joan etorri masiboak ematen ari dira, “arazo larri horiei erantzuna eman beharra dago”.
Egungo ereduaren alderik latzena ere izan dute hizpide agerraldian, eta Zaldibarko zabortegiari aipu berezia egin diote horren harira. Urtebete izango da aurki eraitsi zela eta Alberto Sololuze eta Joakin Beltran hondakin, eta zabor azpian hil zituela, “Joakinek (Beltran) oraindik ere zabortegiko hondakinen azpian desagertuta jarraitzen du”.
Erronka zaila dela argi dute, baita atzeraezina ere, “gure espeziearen existentzia ari gara arriskuan jartzen”, eta horrenbestez ezinbestekoan heldu beharrekoa iritzi diote egunetik egunera larriagoa bilakatzen ari den egoerari. Globalki eragiteko, tokian jarduteko konpromisoa berretsi dute, etxetik, auzoetatik, herrietatik eragitea ezinbestekoa delako, norbanakoaren konpromisoa bezalaxe.
Astigarra-Lezo AHT bezalako proiektuen, eta Amazonen mehatxuaren gaineko informazioa herritarren artean zabaltzeko konpromisoa ere hartu dute bildutakoek, horien ondorio larriak salatzearekin batera, eta horretarako hainbat ekintza antolatu dituzte Errenteria-Oreretan, Lezon eta Oiartzunen. Larunbatean elkarretaratzera deitu dute hiru herri horietan, 13:00etan. Errenteria-Oreretan Zumardian egin dute hitzordua; Oiartzunen, Done Estebe plazan, eta Lezon Gurutze Santuaren plazan.
Horretaz gain, Oiartzunen Zaldibar Zona cero liburua aurkeztuko du Ahoztar Zelaietak otsailaren 4an 19:00etan pleno aretoan.
Deialdien atzean daudenek gonbidapen zabala luzatu dute gaurko agerraldiaren bidez: herritar guztien inplikazioa ezinbestekoa da egoera lehengoratzeko, proiektu suntsitzaileak gelditzeko, eta ondorioak ahalik eta gehien murrizteko, berandu baino lehen.
