%8,9koa da egungo Lezoko langabezia tasa, otsailekoa baino baxuagoa
2020ko otsailaren bukaeran, pandemia hasi aurretik, %9,2ko langabezia tasa zuen herriak. Egungo langabeen artean 154 emakumeak dira eta 133 gizonak.
2020ko abenduaren 31n 287 pertsona zeuden lanik gabe Lezon, Lanbidek jasotako datuen arabera. Horren arabera, herriko langabezia tasa %8,9koa zen joan den urtearen bukaeran. 2020ko otsaileko azken egunean, herriko langabezia tasa %9,2koa zen (296 langabe). Beraz, antza, koronabirusak erakarritako krisi ekonomikoak ez du oraingoz herrian eraginik izan enpleguan, ez beste herrietan adinakoa behintzat (martxoaren erdialdean hasi zen COVID-19aren eragina, itxialdi orokorrarekin).
Lanbidek jasota dituen datuen arabera, gaur egungo herriko 287 langabeetatik 154 emakumeak dira (emakumeen langabezia tasa %9,8koa da) eta 133 gizonak (%8,1eko tasa). Eta adin tarteari dagokionez, herrian lanik gabe dauden gehienak 45 urtetik gorakoak dira, 153 orotara (63 gizon eta 90 emakume). 25 urtetik beherakoen artean 33 dira lanik gabe dauden lezoarrak (21 gizon eta 12 emakume), eta 26-44 tartekoak 101 dira (52 emakume eta 49 gizon).
2020ko otsailean, pandemia hasi aurretik, esan bezala 296 lezoar zeuden lanik gabe, horietatik 180 emakumeak (%11,5eko tasa) eta 116 gizonak (%7,0). Beraz, esan daiteke Lezoren enpleguaren datuen hobekuntzaren giltzarria emakumeak izan direla, haien langabezia tasak hobera egin duelako azken hilabeteetan, eta okerrera gizonenak.
