Duela 80 urte Pasaiako uretan hondoratutako alemaniar ontzia aurkitu dute
Bigarren Mundu Gerra betean Bilbotik Burdeosera zihoala, arrezife batekin talka egin zuen urpeko ontzi britainiar batengandik ihes egin nahirik.
Donostiako Klub Nautikoko bi urpekarik topatu dute alemaniar ontzia. Argazkia: ETB. 
1942ko ekainaren 7an Pasaiako uretan hondoratutako Joao Pessoa alemaniar merkantzia ontzia aurkitu dute Donostiako Klub Nautikoko bi urpekarik.
Luisma Naya eta Jesus Carlos Preciadok topatu dute Bigarren Mundu Gerra bete-betean hondoratutako ontzi-hondarra, 30 metroko sakoneran. Urpekariek ETBri azaldu diote estrukturaren zati handi bat oraindik kontserbatzen dela urpean.
Zamaontziak Bilbotik Burdeosera nazientzako burdina zeraman, ustez, britainiar urpeko ontzi bat hauteman zuenean inguruan. Alemaniar itsasontzia gehiegi gerturatu zen kostaldera eta Picachilla arrezifearekin talka egin zuen. Barruan zihoazen 44 tripulatzaileek salbatzea lortu zuten.
