Jaizkibelgo ameztia berreskuratzeko lanean ari dira
Ametzei dokia uzteko, batez ere pinuak eta ipar-haritzak kenduko dituzte. Udalak eta Gipuzkoako Foru Aldundiak elkarlanean jardungo dute.
Jaizkibelgo Lezoko lurretan dagoen ameztia berreskuratzeko lanean dabiltza Lezoko Udala eta Gipuzkoako Foru Aldundia elkarlanean. Mendiko lehen eta bigarren dorreen artean dago ameztia, mendiaren gailurretik hego magalerantz doan eremuan. Udalak 18.000 euro jarri ditu lan horietarako, eta jarraipena bi erakundeek egingo dute.
Udalak esan du bertako jatorrizko espeziea dela haritz mota hori (Quercus pyrenaica), eta gizakiaren nahiz suteen eraginez menditik desagertzen joan dela. Suteen arriskua gutxitzeko eta lurzorua ez galtzeko helburuarekin, ordea, aldundiak pinuak landatu zituen han. Orain, pinudi horien azpialdean bertako landaretza ateratzen ari da, ametzak eta urkiak tartean, baita gaztainondoak eta bestelako landareak ere. Beraz, lanen barruan ametzei tokia uzteko hainbat espezie kendu beharko dituzte, tartean pinuak eta ipar-haritzak daudelarik.
Eremu hori Lezoko udalerrikoa den arren, Jaizkibel mendia Ondura Publikoko Mendia da, eta Natura 2000 Sarearen barruan dago. Beraz, Gipuzkoako Foru Aldundia da lan horien kudeaketa daramana. Lanak, hartara, 2013ko maiatzean onartutako Jaizkibel Natura 2000 Sareko Ulia (ES2120014) eta Jaizkibel (ES2120017) Kontserbazio Bereziko Eremu izendatzen dituen eta eremu horien kontserbazio-neurriak onartzen dituen dokumentuaren baitan jasota daude.
