Publiko, doako, unibertsal eta kalitatezko eredu soziosanitarioa helburu
Borroka luzea daramate Errenteria-Oreretan erretiratuek. Lan mundutik erretiratuta bai, baina ekintzailetza soinean dute eta ez daude prest kaleak uzteko, ez bederen, euren eskaera bidezkoak betetzen ez diren bitartean.
Duintasunaren hilabete honetako elkarretaratzeko kide bat. Pentsiodunak eta jubilatuak kalera aterako dira datorren astelehenean. Borroka luzea daramate Errenteria-Oreretan erretiratuek. Lan mundutik erretiratuta bai, baina ekintzailetza soinean dute eta ez daude prest kaleak uzteko, ez bederen, euren eskaera bidezkoak betetzen ez diren bitartean.
Osasungintza publikoak greba eguna du gaur. Kalitatezko osasun sistema publiko baten alde atera dira kalera; bitarteko nahikorik ez duen osasungintza publikoaren ahulezia ageriago utzi duelako oraindik pandemiak. Alor horri egingo dio aipamena asteleheneko elkarretaratzean Duintasuna elkarteak: zerbitzu soziosanitarioari. Izan ere, mendekotasunak edota gaixotasunek baldintzatuta egunerokoari aurre egin behar dioten pertsonek ez dute ataka erraza oinarrizkoak behar luketen zerbitzu horiek eskuratzeko. Aldarri hori eramango dute, beraz, kalera astelehenean: eredu soziosanitario erabat publikoa, unibertsala, doakoa eta zuzeneko kudeaketa duena. Bizitzari eusteko ezinbesteko zerbitzuak direla nabarmendu du elkarteak, “baina gutxi batzuen negozio izatera heldu dira, erabiltzaileen osasuna eta langileen lan baldintza txarren kontura. Paradoxikoa da azken hori, biak beharrezkoak dituztelako, erabiltzaileak eta langileak”.
Gizarte babeserako sistemaren ahulezia eta pobrezia egoeraren gorakada agerian gelditu dela dio Duintasunak.
Gizarte zerbitzuen arreta egunerokoan ezinbestekoa dutela esan du elkarteak, adina eta gaixotasunagatik laguntza pertsonala behar dutenean: “Familiaz aparte, administrazioak mendekotasunak dituzten edo kalteberak diren pertsonen, familia izan edo ez, ongizatea ziurtatzeko bitartekoak jarri behar ditu”.
Gai honetan ere emakumeak omen dira kaltetuenak. Soldata eta pentsio arrakala agerikoa bada, berdin gertatzen da mendekotasun balorazioetan, “genero arrakala azaltzen da arlo horretan ere”. Hori ere salatuko du Duintasunak astelehenean.
Eskaera zehatza, eredu soziosanitario publikoa, doakoa, unibertsala eta kudeaketa zuzenekoa; zaintza indartzea eta egoitza publikoen sarea ziurtatzea. Horrekin batera, 1.080 euroko gutxieneko pentsioa eta 1.200 euroko gutxieneko soldata.
Hitzordua, astelehenean, otsailak 1, 11:00etan Herriko Plazan.
