COVID-19: Oiartzun da gorrian ez dagoen Oarsoaldeko herri bakarra
Errenteria-Orereta COVID-19aren eremu gorrian sartu da asteburuan 60 positibo jaso direlako. Pasaian, pixka bat jaitsi egin da tasa; Lezon, nabarmen gora.
Koronabirusaren eragina indartzen ari da Oarsoaldean. Jada hiru herri daude eremu gorrian (100.000 biztanleko tasa 500dik gora dutenak). Asteburuan jasotako datuen ondoren, Errenteria-Orereta Pasaiari eta Lezori gehitu zaio. Oiartzun da eremu horretatik salbu dagoen bakarra.
Asteburuan COVID-19agatik 60 positibo gehiago atzeman dira Errenteria-Oreretan, 22na ostiral eta igandean, hamasei larunbatean. Horren eraginez, tasak oso nabarmen egin du gora, 520ra iristeraino. Beraz, eta Jaurlaritzaren aginduen zain, bihartik bertako ostalaritza establezimenduek ateak itxi beharko dituzte, eta profesionala edo erdi-profesionala diren kiroletan bakarrik egin ahal izango dira entrenamenduak.
Lezon, asteburuko kutsadurek areago igo dute herriko tasa. 740koa da, ostiralean hiru kasu gehiago, larunbatean beste sei, eta igandean bost atzeman zirelako.
Azken orduetan Pasaiako tasak pixka bat behera egin du, baina 600eko zifratik jaitsi gabe. 627koa da tasa hori, osteguneko 645en aldean. Ostiralean 11 kasu bildu ziren, larunbatean zortzi, eta igandean lau.
Jarraian, herriz herrikako tasak asteburuko datuak aintzat hartuta:
- Lezo: 740,13 (ostegunean 542,76).
- Pasaia: 627,92 (ostegunean 645,86).
- Errenteria-Orereta: 520,21 (ostegunean 400,74).
- Oiartzun: 376,12 (ostegunean 337,54).
- Gipuzkoa: 574,91 (ostegunean 534,24).
Osasun Sailak datu horiek guztiak bere webgunean ditu. Bertara sartu eta kontsulta sakonagoak egiteko aukera dago.
