Gezalako lagun izan daitezke lezoarrak (eta kanpokoak)
Txartela erosiz gero, Gezalako emanaldietarako deskontuak, doako emanaldiak, eta zozketak izango dituzte eskura horien jabeek.
Lezoko Udaleko Kultura Sailak Gezalan egiten diren ekitaldietarako txartela jarri du salgai, Gezala Auditoriumeko Lagun Txartela. Horren prezioa 25 eurokoa da (20 Gazte Txartelarekin eskuratzen dutenentzat), eta urtean zehar Lezoko kultura aretoan egiten diren ekitaldi guztietarako deskontuak eta bestelako abantailak izango dituzte txartelaren jabe egiten direnek. Horiek Kultura Sailean eta udalaren webgunean lor daitezke (postaz bidaliko diete txartela online erosleei).
Besteak beste, Gezalan egiten diren kultur ekitaldi bakoitzean hiru euroko deskontua jasoko dute tiketak txartelarekin eskuratzen dituztenek (haurrentzako ekitaldietarako izan ezik). Gainera, txartelaren jabeek sarrera bat doan izango dute aretoan egingo den musika emanaldi baterako, dantza saio baterako, edo haurrentzako programazioko jarduera baterako (bi sarrera kasu honetan). Doan baliatzeko ekitaldiak aurrez aukeratu behar dira.
Txartela erosteak ez du programazioko ekitaldi guztietarako sarbidea ziurtatzen. Hau da, txartela duenak nahi dituen ekitaldietarako sarrerak erosi beharko ditu beti, eskuragarri dauden heinean, eta ekitaldiaren eguna baino lehen. Euskarria pertsonala eta besterenezina da, eta erabilera bakarra emango du ekitaldi bakoitzeko.
