[Bideoa] Trapujale: "Hurrengo urtean Inauteriak behar bezala ospatuko ditugu"
Lezoko epaile nagusiak herriko inauteriak bertan behera utzi ditu. Erreakzioak berehala iritsi dira, tartean Trapujalerena.
Lezoko epaitegiak erabaki gogor bat hartu behar izan du gaur goizean. 2021ean ez da Inauteririk izango herrian. “Asko pentsatu ondoren, ez dut beste irtenbiderik. Osasun arazoak direla eta, aurtengo inauteriak bertan behera uztea erabaki dut. Eta erabaki honek ez du atzera bueltarik”, esan du herriko epaile nagusiak.
Epailearen erabakiaren gaineko erreakzioak berehala iritsi dira. Trapujalerena lehena: “Ni ere nire kobazuloan, Jaizkibelen, konfinatuta nago. Dena den, urtero bezala bisita egingo dizuet”. Hala, udaletxeko balkoian izango dela konfirmatu du Trapujalek. “Datorren urtean, indarberriturik eta sasoi betean, inauteriak behar bezala ospatuko ditugu”.
Munttar ziriku nagusiak ere adierazpenak egin ditu. Latzak. Horiek denak Trapujale Taldeak egindako bideoan ikus daitezke.
