Arcada En La Grada txiki utzi du Jaixki AFTk
Amurrioko taldea 11-1 emaitzarekin gainditu zuten lezoarrek Bekoerrotan larunbatean. Emaitza horri esker bigarren jarri dira bere multzoko sailkapenean.
Argazkia: Instagram / Jaixki AFT Etxeko sendotasuna mantentzen jarraitzen du Jaixki AFTk. Larunbatean, Arcada En La Grada Amurrioko taldearen bisita jaso zuten areto futboleko Euskal Ligan dabiltzan lezoarrak, eta zalantza izpirik uzten ez duen emaitzarekin gainditu zituzten arabarrak: 11-1. Laugarren jardunaldiko partida atzeratua zen Bekoerrotan jokatu zutena.
Hala, bederatzi partida jokatu dituztenean, bere multzoko sailkapenean (bi multzo daude) bigarren jarri dira Jaixkikoak 16 punturekin; puntuetan berdinduta dituzte Zirauntza (7 partida jokatu dituzte) eta Aretxabaleta (8 partidarekin) taldeak. Mondrate da liderra, 22 punturekin.
Osasun egoerak baimentzen badu, hurrengo partida asteburuan dute Jaixki taldekoek, berriz ere Arcada En La Gradaren kontra, baina kasu horretan Araban.
Larunbateko partidako golak ikusteko, joan Jaixkiren Instagram kontura.
