Oarsoaldeko ondarea familian ezagutzeko ibilaldiak proposatu dituzte
'Iber3' iniziatibak eskualdeko udalerriak ikertzea du helburu. Hiru ibilbide mota proposatu dituzte: neurtuak, interaktiboak eta orientaziokoak.
Iniziatiba martxan jarri dute haurrek eta familiek jarduera aktiboak egiten jarrai dezaten. 
11 ikastetxe 11 tontor iniziatibaren baitan iber3 proiektua jarri dute martxan, Oarsoaldeko ingurune hurbila, herri ondarea eta historia ezagutzeko. Helburua da, koronabirusak eragindako mugikortasun mugen gainetik, haurrek eta familiek jarduera aktiboak egiten jarrai dezaten etxe alboan dutena ezagutu eta horrekin gozatuz.
Bailarako herri bakoitzerako hiru paseo mota diseinatu dira: ibilaldi neurtuak, ibilaldi interaktiboak eta orientazio ibilbideak. Horien bitartez, ingurua ezagutzeaz gain, bideetan zehar aurki daitezkeen elementu natural zein historikoekin elkar eragingo dute ibiltariek.
Egitasmoaren barne antolaturiko askotariko jarduerak honako esteka honen bitartez kontsulta daitezke. Besteak beste, jarduera hauek jasoko dira:
- Ibilaldi neurtuak. Herrian zehar edo landa edo mendi ingurunean zehar diseinatutako ibilbide jakin batean, puntu batetik bestera eta, orokorrean, zehaztutako erritmoan oinez, korrika edo bizikletan osatu beharreko ibilaldiak izango dira.
- Ibilaldi interaktiboak. Herrian zehar edo landa edo mendi ingurunean zehar diseinatutako ibilbide jakin batean, inguruarekiko informazioa eskuratu edo harekin elkarreraginez galdetegi bat osatzean oinarrituko dira ibilaldiak.
- Orientazio ibilbideak. Herrian zehar edo landa edo mendi ingurunean zehar diseinatutako ibilbide jakin batean, mapan zenbakiz adierazitako puntuak dokumentu berean azaltzen diren hizkidun argazki edo irudiekin zuzen erlazionatzean oinarrituko dira ibilaldiak.
Jarduerak era egokian burutu diren ziurtatzeko ibilaldi neurtu eta orientazio ibilbideetan jasotako emaitzak norberaren ikastetxeetako Eskola Kiroleko koordinatzaileari helarazi beharko zaizkio. Ibilaldi interaktiboetan, ordea, galdetegiak erantzun besterik ez dira egin beharko, bertako informazioa zuzenean iritsiko baitzaio koordinatzaileari.
