"Lehen lerroan" dauden ertzainei txertoa jartzen hasiko dira, Oiartzunen
Gipuzkoako ertzainek Oiartzungo instalazioetan jasoko dute AstraZenecaren dosia. Arkaute eta Erandion jasoko dituzte besteek. Guztira, 4.500ek jasoko dute.
Eusko Jaurlaritzaren Segurtasun Sailak jakinarazi duenez, datorren astelehenean hasiko dira “lehen lerroan” dabiltzan ertzainei txertoa jartzen. Gipuzkoan Oiartzungo basea da aukeratu duten instalazioa; Arkaute Araban izango da, eta Bizkaian, Erandion. Txertaketa kanpainari aurre egiteko baldintza onenak dituzten egoitzak dira, Segurtasun Sailaren arabera.
4.500 ertzainek jasoko dute txertoa, lan taldearen %60. Egunean 300 edo 400 ertzainek jasoko dute txertoa, eta bizpahiru astetan luzatuko da kanpaina. Gobernuaren iturriek esan dutenez, “irizpide mediku eta epidemiologikotan” oinarrituko dira kanpaina aurrera eramateko.
