Antxoko eraso matxista salatu dute Pasaiako Udalak eta Aldundiak
Bi instituzioen baliabideak biktimaren eskura jarri eta elkartasuna adierazi diete emakumeari, nahiz haren senitarteko eta lagunei.
Harremantxo talde feministak salatu zuen publikoki larunbatean izandako eraso matxista. 
Antxon joan den larunbat gauean emakume batek jasandako eraso sexistaren aurrean, Pasaiako Udalak eta Gipuzkoako Foru Aldundiak gaitzespen irmoena azaldu nahi izan dute, eta beren laguntza eta babesa adierazi diete erasoa pairatu duen emakumeari, nahiz haren gertuko lagun eta senitartekoei.
Emakumeen kontrako indarkeriaren aurrean erantzun publikoa emateko Gipuzkoako protokolo instituzionalari jarraituz, Foru Aldundiak bat egin du Pasaiako Udalak erasoa gaitzesteko argitaratu duen adierazpenarekin eta ohartarazi du halako gertaeren oinarrian gizon eta emakumeen berdintasun falta dagoela, emakumeak kontrolpean eta mendean izan nahi dituzten jarrera eta ideia matxistak.
Pasaiako Udalak eta Berdintasun Mahaiak gogora ekarri dute hilaren 12an Sestaon senarrak eraildako Conchi Gonzalez. Bortizkeria matxistaren ondorioz 2003. urtetik hildako 109. emakumea da Euskal Herrian.
