Gazteentzako zuzkidura bizitokiak esleitzeko prozesua hilabete honetan hasiko du Eusko Jaurlaritzak
51 alokairuzko zuzkidura bizitoki AZB adjudikatuko ditu Etxebizitza Sailak 36 urtetik beherako gazte eta familientzat.
Aste honetan hasiko dituzte apartamentuak egiteko lanak. Lurralde Plangintza, Etxebizitza eta Garraio Sailak datozen egunetan argitaratuko du Euskal Herriko Agintaritzaren Aldizkarian Errenterian 51 alokairuzko zuzkidura bizitoki (AZB) adjudikatzeko prozesua hasteko agindua. Hiru kide baino gutxiagoko bizikidetza unitateak dituzten 36 urtetik beherako pertsonei zuzenduta daude, eta hilabeteka okupatu ahalko dira, gehienez ere, urtebetez. Epe hori lau aldiz luzatu ahalko da. Esleitu suertatzen direnek, hilean kanon bat ordainduko dute; kanon hori, haien diru sarrera haztatuen %30 izango da gehienez ere.
Bizitokietatik hiru, mugikortasun urriko desgaitasuna duten gazteentzat izango dira, eta gainerako 48ak, honela banatuko dira: hiru, eskubide subjektiboa aitortuta duten pertsona edo familientzat; zazpi egiaztatutako etxebizitza premia berezia dutenentzat; eta 38 onartutako gainerako pertsonentzat.
Errenteriako Udalak utzitako lurzoruan eraiki dituzte 51 bizitokiak.
Prozesuan sartzeko baldintzak, honakoak: 36 urtetik beherakoa izatea; Donostialdea Bidasoa Beherako eremu funtzionalean alokairuko etxebizitzaren eskatzaile gisa izena emanda egotea Etxebiden agindua argitaratu aurretik; Errenterian erroldatuta egotea; aurreko bi urteetan jabetzako etxebizitzarik, azalera eskubiderik, edo gozamen eskubiderik ez izatea; eta 3.000 eta 39.000 bitarteko diru sarrera haztatuak izatea 2019ko errenta ekitaldian (inskripzioan sartutako titularren diru sarreren batura). Irizpide ekonomiko hori ez da kontuan hartuko mugikortasun urriko desgaitasuna edo desgaitasun psikikoa duten pertsonen, genero indarkeria sufritzen duten emakumeen, edo etxebizitza eskubide subjektiboa aitortuta duten pertsonen kasuan.
Agindua Aldizkari Ofizialean argitaratu eta hamar egun baliodunetan aurkeztu ahal izango dira eskabideak telematikoki, aurrez aurre Zuzenean Zerbitzuan ( Andia kalea 13, Donostia) aurretiko hitzorduarekin, edo posta bidez (Gipuzkoako etxebizitza lurralde ordezkaritza, Andia kalea 13, 6.a 20.004 Donostia).
