Topoa lurperatzeko aurrelanak egiten hasi dira Gure Zumardian
Hamar egunetan amaituko dituzte lurzorua aztertzeko beharrezko diren landa lanak. Lau metroko sakonerako zuloak egingo dituzte laginak eskuratzeko.
Gaur goizean hasi dira Gure Zumardian Altza-Galtzaraborda topo zatia lurperatzeko lehen azterketa geologiko-geoteknikoa egiteko beharrezko diren landa lanak egiten. Horien iraupena, gutxi asko, hamar egunekoa izango dela iragarri du udalak.
Aurrelan horien bitartez, topoa lurperatuko den lurzoruaren ezaugarriak ezagutuko dira, eskakizunak zeintzuk diren jakiteko eta lanak planifikatu ahal izateko. Herriko plazako lau gunetan zundaketa makina erabiliz zulaketak egingo dira, presioak eta maila freatikoa zehazte aldera, besteak beste. Entsegua bukatu eta gero, zuloa zementuz estaliko ditu udalak.
Estimazioa da lau metroko sakonerako laginketak egitea. Aurreko lan horiek egin eta gero, aurreikusi dute trazadura lanak eta geltoki berria “laster batean lizitatzea, eta proiektua aurtengo urtean egikaritzen hastea”. Zulaketak egiten ari diren bitartean, laginketak egiteko lau guneak itxi egingo dira.
