Udal gobernuari eta egiten duen kudeaketari nota jarri diote herritarrek: oso ongi
Herritarren artean inkesta egin du Aztiker Soziologia Ikerguneak; helburua, herritarrek udalerriarekin zein udal politikekin duten asebetetze maila neurtzea izan da eta bikainera ez bada heldu balorazioa ere, bidean da.
Ekhi Zubiria Aztikerreko ikerlaria, Aizpea Otaegi alkatea eta Maite Gartzia alkate ordea gaurko agerraldian. Argazkia: Herri Bizia Herritarren artean inkesta egin du Aztiker Soziologia Ikerguneak; helburua, herritarrek udalerriarekin zein udal politikekin duten asebetetze maila neurtzea izan da eta bikainera ez bada heldu balorazioa ere, bidean da. Inkestatu dituzten herritarren 7,1eko nota jarri diote udal gobernuari 10etik, eta udalerriarekiko asebetetze mailari dagokionean 8,1ekoa izan da nota.
Ikasturtea gainditzearekin konformatzen dira batzuk, eta ez da bada gutxi, baina Errenteriak berak eta udalerria kudeatzen ari direnak nahikoa soberan gainditu dute bikainaren bidea hartzeko. Udalerriaren alderdi positiboen artean, garraio publikoak dituen loturak, herriko giroa eta bizimodu lasaia; horiek guztiak Errenteria-Oreretaren indarguneak. Ahulguneak ere baditu, ordea herriak, eta inkestatutako herritarrek segurtasun falta eta aparkalekuen premia aipatu dituzte kezka nagusien artean.
Gobernu taldeari zein haren kudeaketari dagokionean, inkestatuen %87k uste du Errenteriako arazoak konpontzen ari dela, edo badakiela bederen, nola konpondu eta denbora behar duela.
Oposizioaz ere mintzo dira herritarrak azterketa soziologikoan; %59,2 erdiak baino gehiagok, uste du ez duela laguntzen ezta oztopatzen ere.
Auzoen gaineko erantzunetan, ezberdintasunak antzeman dituzte: balorazio positiboena Erdigunea Olibet-Etxe Berrietan jaso du udalak, horietan uste baitute udalaren aldetik arreta egokia jasotzen dutela; balantzaren bestaldean, berriz, Galtzaraborda eta Iztietan egin dute baloraziorik negatiboena.
Udalak egin beharreko ekintza ildo garrantzitsuenak ere nabarmendu dituzte inkestatuek: bakarrik bizi nahi ez duten adinekoentzako etxebizitza alternatiba eskaintzea, eta beharra dutenen gizarte babesa bermatzea. Herriko merkataritza eta ostalaritza sustatzea ere ildo garrantzitsuetako bat da.
Konfinamenduaren zama agerian
Ez dagokio soilik Errenteria-Oreretari, pandemiak mundua jarri delako hankaz gora osorik, baina hala ere, Aztikerren inkestan jakin nahi izan dute nola eragin dien COVID-19ak herritarrei, nola bizitzen ari diren egoera eta zein ondorio izaten ari den. Horrekin lotuta, datu bat: Etxeko konfinamenduan oso gaizki moldatu direla erantzun du inkestatuen %24ak, ia laurden batek. Udalak hartutako pandemiari aurre egiteko neurrien artean ezagunenak, berriz, herritarren artean, adinekoei banaka telefonoz deitzeko eta laguntza eskaintzeko iniziatiba —inkestatuen %81,7k ezagutzen zuen— eta kontsumorako bonuen iniziatiba —%80ak ezagutzen zuen—.
Abenduko azken asteetan eta urtarrila hasieran egin zuen inkesta Aztikerrek. 2016an egin zuen udalak lehen aldiz halako inkesta bat, eta bi urtetik behin errepikatu du; honakoa beraz, hirugarren aldia izan da. 600 inkesta egin dituzte guztira Errenteria-Oreretan bizi diren 18 urtetik gorako pertsonen artean. Ausaz aukeratu dituzte pertsona horiek, eta azken laginak udalerriko biztanleriaren errealitatea ordezkatzen du.
Inkestaren bidez jaso diren iniziatibak eta atera daitezkeen ondorio nagusiak oso garrantzitsuak dira udalarentzat, “martxan diren edota agintaldian zehar martxan jarriko diren proiektuak eta udal politikak zehazteko lagungarri direlako”.
Txostena osorik hemen deskarga daiteke.
