Hondakinen gaikako bilketak bi puntuan egin du gora
2020. urtean 2019an baino 11 kilo hondakin gutxiago bota ditu errefusaren edukiontzira herritar bakoitzak.
Lemos, Ferradas, Palencia, Murua eta Errazkin gaurko agerraldian. Hondakinen bilketaren gaineko balorazioa egin du gaur udalak. Berri positiboa, 2020n, bi puntuan egin du gora gaikako bilketak. Balorazioa Jose Manuel Ferradas Ingurumen zinegotziak egin du, alderdi politiko guztietako ordezkariek lagunduta, Bernar Lemos (EH Bildu), Isaac Palencia (PSE-EE) eta Elixabete Murua (EAJ); mahaian izan da haiekin batera herritarren izenean Hondakinen Mahaiko kide den Andone Errazkin.
Hiru urte dira udal talde guztiek aho batez Hondakinen Udal Ordenantza onartu zutenetik, aho batez, eta 2017an arautu zuen etxeko eta merkataritzako hondakinak jatorrian gaika bereizteko betebeharra, eta frakzio organikoaren bilketari ekin zion —biohondakinak—. Gaikako bilketan ere helburu bat finkatu zuen udalak: %60. Ordenantza horri eta Errenteriako herritarren ardurari esker Hiri Hondakin Solidoen %62,8 gaika bildu zela 2020an nabarmendu du Ferradasek; 2014an %31,8koa izan zen gaikako bilketa; 2016an %42,3koa; eta 2019an, %60,3koa.
Hori horrela izan dadin, zerbitzu eta baliabide berriak ezarri dituela udalak aipatu du Ingurumen zinegotziak: bosgarren edukiontzia, gaikako bilketa modernorako kamioi eta ekipo berriak, Hiri Hondakin Solidoen jarraipena egiteko Dorlet Dass programa informatiko berritzailea, doako poltsa konpostagarriak banatzeko zazpi makina, etxeko hondakin toxiko eta arriskutsuetarako bi atoi, hondakin handien bilketa egiteko zerbitzua, kalerako gaikako bilketarako egokiak diren edukiontzi misto berriak, fiskalitate berdea hobarien bidez, eta hondakinen inguruan herritarrak informatzeko eta sentsibilizatzeko ingurumen kanpaina iraunkorrak. Neurri horiek guztiek eta herritarren jarrerak ahalbidetu dute gaikako hondakinen bilketan gora egitea Errenteria-Oreretan.
Datu gehiago, 2019an errenteriar bakoitzak 369,9 kilo hondakin gaika eraman zituen edukiontzietara; 2020an, 381,3 kilo izan dira, “errefusari 11 kilo kendu dizkiogu biztanleko, eta hori datu oso garrantzitsua da”.
Positiboa irakurketa, beraz, baina puntu iluna ere aipatu dute gaurko agerraldian: edukiontzi multzoetan, gutxi batzuk, uzten dituzten altzariak edota tamaina handiko hondakinak. Kanpaina berezia egiten ari da udala gogorarazteko doako zerbitzua eskaintzen duela hondakin handi horiek modu erosoan biltzeko; hala ere, gutxi batzuk zerbitzua erabili beharrean, modu ezegokian jarraitzen dute uzten hondakin handi horiek edukiontzietatik kanpo. Jarraipen berezia egiten ari da udala, eta horren harira Udaltzaingoa, hondakinen araudia urratzen dutenak zigortzeko, “hondakinak kalean uzten dituztenak edo sortutako hondakinak birziklatzen ez dituztenak zigortzen ari da udala, oraindik ere horrelako jarrerak ikusten baitira gure kale, auzo eta mendietan”.
Halako jarrerak ezin direla ezjakintasunaren atzean ezkutatu esan du Ferradasek, “hamaika kanpaina egin ditugu eta jendeak badaki ezin dela hala jokatu, egiten dutenak, beraz, jakinaren gainean egiten dute, gaizki ari direla jakinda, alegia”. Horrekin lotuta, urtarrilean bederatzi zigor espediente izapidetu direla jakinarazi du Ferradasek, eta zazpi zigor proposamen egin direla, “zenbaki txikia eman dezake, baina iaz, lehen hiru hilabetean lau zigor proposamen eta eta hiru espediente izapidetu ziren”. Arau hauste horiek, edukiontzi irletan altzariak eta tamaina handiko hondakinak uzteagatik izan dira, baita autonomoren batek obrako hondakinak kalean uzteagatik ere.
Hondakin handi horiek biltzeko doako zerbitzua du udalak. Erraza da. Herritarrek, 943 341 345 telefono zenbakira deitu behar dute astelehenetik ostiralera 08:00etatik 15:00etara eta hitzordua jarriko dute zerbitzuan ari diren langileekin. Bilketarako eguna eta ordua, zein bilketarako puntu bat zehaztuta, zerbitzu horretako langileak bertaratzen dira altzari edota tamaina handiko hondakin hori jasotzera.
