[Bideoa] 'Lope de Isasti eta goiko elizako aziyua' aurkeztu dute
Lezokuak bildumako hirugarren argitalpena Mikel Susperregik idatzi du, Lander Zurutuzaren ilustrazioekin. Gaur aurkeztu dute, Donostian.
Xanti Val Lezoko Udaleko Kultura teknikaria, Mari Jose Telleria Kultura Foru zuzendaria, Ion Pombar Kultura zinegotzia eta Mikel Susperregi idazlea, gaurko aurkezpenean. Lope de Isasti eta goiko elizako aziyua ipuin ilustratua aurkeztu dute gaur Donostiako Koldo Mitxelena kulturgunean. Lezokuak bildumako hirugarren argitalpena da, Joanes Salaberriaren hilketa eta Maria Labaienen apustua dira aurreko biak. Haietan bezala, berri honetan Mikel Susperregi arduratu da testuak ontzeaz, eta Lander Zurutuzak erantsi dizkio irudiak.
“1606ko maiatzeko gau batean, Lope de Isasti, herriko bere lagun, senide eta agintari batzurekin goiko elizan sartu zen German de Ugarte inkisidorearen hilarria beste batengatik aldatzeko asmoarekin. Ekintza honengatik Isastik liskar haundia izan zuen herriko bikarioarekin”. Pasadizo horrek ematen du ipuinaren hasierako tramaren berri, betiere kontakizuna Lope de Isasti lezoarrean zentratua dagoelarik: apaiz, teologian doktore, kronista eta historialaria izan zen, eta 1625. urtean bere obrarik garrantzitsuena idatzi zuen, Compendio histórico de la muy noble y muy leal provincia de Guipúzcoa-Gipuzkoako historia jasotzen duen konpendioa.
Bildumako aurreko lanetan bezala, egungo eta iraganeko pasarteak partekatzen dira ipuinean. Eta elkarrizketetan, Lezoko euskara darabilte protagonistek, “gure herriko memoria historikoaren transmisioarekin batera hori delako bilduma honen helburuetako bat: gure amonen eta aitonen euskara bizirik mantentzen laguntzea, edo behintzat, ezagutaraztea”.
Lope de Isasti Gipuzkoa mailako pertsonaia izanik, ipuinaren zabalpena ere horretara egokituko da. Lezo Institutuko eta Pasaia-Lezo Lizeoko DBHko ikasleen artean zabaltzeaz gain, Errenteria-Oreretako, Pasaiako, Oiartzungo, Irungo eta Zizurkilgo hainbat ikastetxetan banatuko dute argitalpena. Ipuina irakurritakoan, Mikel Susperregi bera joango da lanaren gaineko saio dinamikoak ikasleekin batera egitera.
Gaurko aurkezpenean, Mikel Susperregi idazleaz gain, Mari Jose Telleria Kultura Foru zuzendaria eta Ion Pombar Lezoko Kultura zinegotzia izan dira. Agerraldia osorik ikusteko aukera beheko bideoan dago.
