Lezoko EH Bildu: "Euskal Herria plazako zuhaitzak moztea baino, mantenua egitea egokiagoa da"
Koalizioak argitu du udaleko Ingurumen teknikariaren nahiz lorezaintza zerbitzuko teknikariaren txostenak zuhaitzak moztearen kontrakoak direla.
Euskal Herria plazako zuhaitzak kimatu eta mozteari egin dio udalak aste honetan. Herritarren protestak medio, lanak gelditu ditu Lezoko Udalak. Horren harira, Lezoko EH Bilduk gaiaz duen iritzia plazaratu du: “Euskal Herria plazako zuhaitzak moztea baino, mantenua egitea egokiagoa da”. Udalak abiatutako lanen kostua 10.500 eurokoa dela zehaztu du alderdiak, eta teknikarien iritziaren kontra egiten ari direla erantsi du. 21 platanondo daude inguru horretan.
Bi txosten tekniko hartu ditu oinarritzat koalizioak zuhaitzen mantenduaren alde egiteko, bat udaleko Ingurumen teknikariarena, eta bestea herriko lorezaintza zerbitzuaz arduratzen den enpresako teknikariarena. EH Bilduren arabera, bi txostenek ondorio berbera dute, zuhaitzak ez kimatzea komenigarriago dela, alegia. Gainera, beste datu bat eman du koalizioak: Gipuzkoako Foru Aldundiko Bide Azpiegituretako zerbitzuko teknikariak zuhaitz horiek errepidearentzat ez direla arriskutsuak esan du.
Koaliziokideek azaldu dutenez, zuhaitz horiei orain arte ez zaie kopa jaitsierarik egin, eta horien egitura naturala mantendu du horrek, “adarrak hausteko arriskua gutxitu egiten du horrek”. Bestetik, zuhaitzak ebaki edo kimatuz gero, sortuko diren adar berriek tentsio handia sortuko luketela esaten dute EH Bildukoek txostenetan oinarrituta, “adarrak puskatzeko arriskua handiagoa litzateke”. Gainera, behin kimatu den zuhaitza maiztasun zehatz batekin kimatzen jarraitu behar dela jasota dago agiri horietan, “horrek lorezaintza zerbitzuarentzako gain-kostua eragingo luke”.
