'Alkaldadarik' ez dutela onartuko esan dute haserre
Euskal Herria plazako zuhaitzak "ezkutuan kimatu" dituztela-eta, elkarretaratzea egin zuten atzo iluntzean Gurutze Santuaren plazan hainbat herritarrek.
Atzoko elkarretaratzearen irudi bat. Euskal Herria plazako zuhaitzak “ezkutuan kimatu” dituztela-eta, elkarretaratzea egin zuten atzo iluntzean Gurutze Santuaren plazan hainbat herritarrek. Ez da berria afera, duela urtebete, pasa den otsailean zehazki, Lezoko Udalak 26 platanondo kimatu eta lau metro eta erdira murrizteko asmoa zuen, Euskal Herria Palzakoak ziren batzuk, eta Elias Salaberria hiribidekoak beste batzuk. Txosten teknikoek kimaketa ez zela beharrezkoa esan zuten orduan, eta bertan behera uzteko eskatu zuen Zuhaitzen Lagunak taldeak.
Iaztik ez dira baldintzak aldatu atzo protestara deitu zuten herritarren esanetan; txosten teknikoetan ez dela aldaketarik ematen eta beraz, duela urtebete lortutako adostasuna urratzen ari dela udala diote. Bilera bat egiteko zain dira, eta bien bitartean, bertan behera utzi ditu kimaketak udalak. Atzo salatu zutenez, “ezkutuan” egiten ari dira kimaketak, eta horren harira “alkaldadarik” ez dutela onartuko esan zuten haserre bildutakoek, errespetua eskatu zuten zuhaitzentzat, “herritar guztien ondarea diren neurrian”, eta zaintza egokia exijitu zuten.
Zuhaitz horien kimaketaren kontra sinadura bilketa ere jarri dute martxan.
