Hamarkada bat guztiontzako mundu bat eraikitzen
Mindara Gipuzkoako Aniztasun Funtzionala duten pertsonen elkarteak hamar urte bete ditu. Pandemia testuinguruak baldintzatuta, argazki erakusketa antolatu dute ospatzeko.
Tarta eta guzti. Hala ospatu zuten astelehenean Mindara Aniztasun Funtzionala duten Gipuzkoako pertsonen elkartearen hamargarren urteurrena. Protagonista nagusiak ez ziren izan ekitaldian; Mindaran familia berri bat, bizitza eraikitzeko modu bat eta batez ere integrazioa eta aniztasuna aurkitu duten neska eta mutilak. Pandemiak ez zien bertaratzeko aukerarik eman, baina argazki eta mezu bidez bertan izan ziren haietako asko eta asko, Peru, Amets, Maddi, Matias, Unai, Oskitz, Suhar, Ane…Hamargarren urteurrena ezingo dute desio bezala ospatu, baina, argazki erakusketa antolatu dute hamar urte hauetako ibilbidea erakusteko, eta bideoa ere osatu dute familia, erabiltzaile, pilota egokituko taldeko kirolari, Mindaran lanean ari diren profesional, eta beste eragileekin. Bizi Poza elkarteak eta Pirritx, Porrotx eta Marimototsek era bat egin dute bideo horretan, Mindara zoriondu eta bide oparo eta luzea opatzeko.
Juan Luis Alonso presidenteak, esker on hitzak izan zituen elkartea osatzen duten familientzat, erabiltzaileentzat eta «elkartearen altxorra diren» profesionalentzat, «lan ikaragarria egiten dute gure seme-alabekin». Ez zuen ahaztu Mikel Izagirre sortzailea, «Mindara bere ametsa zen, eta orain gu guztion ametsa da».
Erronka nagusia
Erronka nagusia aurrera begira, elkartera jotzen duten haur eta gazte guztiei erantzuna eman ahal izatea, «gero eta gehiago dira», eta horrekin batera, duela hamar urte hasi zuten lanari segida ematea, «guztiontzako mundu bat eraikitzea». Familia eta erabiltzaileen babesleku, familia handia, lasaitasuna, lagunak egiteko espazioa, formaziorako eremua, askatasuna eta maitasunerako txokoa, berdintasunerako topalekua, bigarren etxea… hala definitu dute Mindara bertan ari diren haur, gazte eta familiek, eta denaren gainetik ideia bat nabarmendu dute, «benetako inklusiorako espazioa da elkartea».
Mindararen erakusketak astelehenean zabaldu zituen ateak Xenpelar Etxean eta 27ra arte izango da bisitatzeko aukera astelehenetik larunbatera 17:00etatik 20:00etara.
