2022an itzuliko da Landarbaso Trail
Otsailarekin batera, Landarbaso Trail mendi lasterketarako izen ematea zabaltzea tokatuko litzateke, pandemiak baina, beste urtebetez, lasterketa hori bertan behera uztea ekarri du.
Otsailarekin batera, Landarbaso Trail mendi lasterketarako izen ematea zabaltzea tokatuko litzateke, pandemiak baina, beste urtebetez, lasterketa hori bertan behera uztea ekarri du. Antolatzaileek zabaldutako idatzian jaso dutenez, egungo egoerak aurten ere, geldialdia egitera derrigortu ditu: “Urte beteko bizia soilik duen lasterketa gara, ilusio eta gogo handiz antolatu genuena eta balorazio oso positiboekin itxi genuena. Indarrez gaude bigarren ekitaldiari heltzeko, baina lan taldean, mendi lasterketa bat festa giroan egin behar dela argi daukagu, eta baldintza hori betetzen ez duen lasterketari ez diogu zentzurik hartzen”.
Horretaz gain, lantalde txikia dagoela lasterketaren atzean eta ia egunero etengabe aldatzen ari diren arau, lege eta baldintzei erantzutea ezinezkoa egiten zaiela erantsi dute.
Garai hobeak helduko diren zalantzarik gabe, 2022ra arte atzeratzea erabaki dute bigarren ekitaldia: “Ziur gara iritsiko direla garaiak korrikalariek eta ikusle denek mendiaz gozatzeko aukera izango dutenak”. Gomendiorako tartea ere hartu dute: “Bitartean segi zuen kabuz mendiaz eta naturaz gozatzen eta laster arte”.
