Emakumeek hiria birpentsatuko dute
Genero eta Hirigintza taldeak Emakumeek hiria nola bizi dugun birpentsatuz. Eta guk zer egin dezakegu? hitzaldia antolatu du Emakumeen Etxean.
Genero eta Hirigintza taldeak Emakumeek hiria nola bizi dugun birpentsatuz. Eta guk zer egin dezakegu? hitzaldia antolatu du Emakumeen Etxean. Ostegunean izango da 18:00etatik 20:00etara, formatu birtualean, eta gaiaren gainean eztabaidatzeko Zaida Muxi arkitektoa izango da aditu gonbidatua. Punt6 kolektiboaren sortzaileetako bat da Muxi eta Mujeres, casas y ciudades. Mas alla del umbral liburuaren egilea.
Arkitekturaren eta hirigintzaren historia berridazte proposatu du Muxik liburuan, historia orokorrean isilarazi dituzten emakumeek egindako ekarpenetatik abiatuta, “hiriak berdintasunezkoak eta bidezkoak izan daitezen, emakumeen hiri esperientziak behar ditugu, egunerokotasunetik eta zaintzatik abiatuta”.
Zoom bideokonferentzien plataformaren bidez sartu behar da honako esteka honetan mahai inguruan parte hartzeko, eta bide hori lehenetsi badute ere, internetarekin edota teknologiarekin arazoak dituzten emakumeentzat Emakumeen Etxera hurbiltzeko aukera zabalduko dute antolatzaileek. Online zein aurrez aurre parte hartzeko, gainera, izena eman behar da 943 44 96 30 telefono zenbakira deituta edo e-posta idatzita.
