Gizonezko bat atxilotu dute, aizkora batekin gazteak mehatxatzeagatik
Kaputxadun gizona Trintxerpen atxilotu dute, suhiltzaile aizkora bat eskutan hainbat gazteri segika zebilela, horiek ihes egiten zuten bitartean.
Artxibo irudia. Agenteek gizonezkoa Euskadi etorbidearen 21. zenbakiaren parean harrapatu dute. 
Aizkora eskuetan, ustez gazteei jarraika horiek mehatxatzen ari zen gizonezko kaputxadun bat atxilotu du Pasaiako Udaltzaingoak.
Atzo, igandea, 20:15a aldera jaso zuten udaltzainek abisua: kaputxadun gizon bat gazte talde bat mehatxatzen ari zen, eskuetan aizkora bat zuela. Agenteek gizonezkoa Euskadi etorbidearen 21. zenbakiaren parean harrapatu zuten, eskuetan suhiltzaile aizkora bat zuela, eta ihes egiten zuten gazteak mehatxatzen ari zelarik.
Udaltzainek adierazi dute pertsona horrek agenteekiko jarrera oldarkorra izan zuela uneoro, eta arma astindu ziela. Hura immobilizatzeko saiakeran hark “erresistentzia handia” jarri zuen arren, arma zuria kendu eta atxilotu egin zuten, gerora Ertzaintzaren egoitzara lekualdatzeko. Bertan, besteak beste, mehatxu-, erresistentzia- eta atentatu-delituak egotziko dizkiote.
