Oarsoaldeko Itaiak formazio saioak antolatu ditu
Hilaren 27an hasiko dira saioak, lau denera, hilean bat. Eztabaidarako eta hausnarketarako guneak izango dira, gai zehatzei buruzko testuetatik abiatuta.
Oarsoaldeko Itaiak lau zatiko formazio saioa antolatu du. Lau egunetan, lau gai landuko dituzte otsailean hasita eta hilean behin (beheko zerrendan daude). Abiapuntua larunbat honetan (hilak 27) izango dute saioek, Patriarkatua eta kapitalismoa izenburupeko jarduerarekin.
Gai zehatzen gaineko testuetatik abiatutako eztabaida eta hausnarketa guneak sortzea da Itaiaren asmoa. “Emakume proletarioa aitortza politikorik gabe subjektu gisa identifikatzen da, eta azpiratuta mantentzen gaitu burgesiak. Gau egungo gizartean, gainera, despolitizazioa nabarmena da”, esan dute Itaiakoek. Egunerokoan emakumeen kontroletik at dauden baldintzek euren erabakiak mugatzen dituztela esan dute taldekideek, “eta horiek normaltzat hartu eta aurrera jarraitzen dugu”. Hor eragitea da Itaiaren asmoa.
Interesa dutenek posta elektronikoz edo sare sozialen bidez (Instagram eta Twitter) jar daitezke Itaiarekin harremanetan, saioetan parte hartu nahi dutela esateko edo informazio gehiago lortzeko. Nahi duena, testu guztiekin osatu duten txostenaren jabe izan daiteke.
Saioak
- Otsailaren 27an, Patriarkatua eta kapitalismoa saioa.
- Martxoaren 21ean, Gorputzaren gaineko interesak saioa.
- Apirilaren 11n, Aniztasuna zentzu guztietan izenburuko jardunaldia.
- Maiatzaren 9an, Antolakuntzaren beharraz lelopeko bilkura.
