Lezoko kale garbitzaile bati eraso egin diote
Erasoaren aurrean, elkarretaratzea deitu du biharko LAB sindikatuak. 12:30ean egingo dute bilkura Gurutze Santuaren plazan.
HITZAk jakin ahal izan duenez, Lezoko kale garbitzaile bati eraso egin zioten atzo (igandea) lanean ari zela, 09:00ak aldera. Jasandako zauriengatik, osasun zerbitzuek artatu behar izan zuten. Langilea kolpatu bakarrik ez; haren defentsan atera ziren herritarrak ere mehatxatu zituen erasotzaileak, polizia agenteak bertan zirela.
Horren harira, “gertakaria salatzeko, sekula pasa behar ez zuen jazarpen hau azkena izan dadin eta erantzukizuna duten agenteei hartu beharreko neurriak hartu ditzaten exijitzeko”, LABek elkarretaratzera deitu ditu herritarrak biharko. 12:30ean egingo dute salaketa bilkura, Gurutze Santuaren plazan.
Aldi berean erasoa jasan duen langileari elkartasuna eta babesa azalduko dizkiote. “LAB Sindikatutik langileak jasandako jazarpena deitoratzen dugu eta langileok nozitzen ditugun erasoek amaitu behar dutela sutsuki adierazi nahi dugu”, esan du sindikatuak.
