Eraso duten langileari elkartasuna adierazi diote
Erasoa gaitzetsi eta elkartasuna adierazi diote pasa den igandean zauritu zuten langileari gaur eguerdian.
Kale garbitzaile batek jazotako erasoa gaitzetsi dute gaur. Erasoa gaitzetsi eta elkartasuna adierazi diote pasa den igandean zauritu zuten langileari gaur eguerdian. LAB sindikatuak deitu du elkarretaratzera eta herritarrek erantzun dute. Bertan izan dira erasoa pairatu zuen langilearen lankideak, Eraso gehiagorik ez, langileon segurtasuna bermatu zioen pankartaren atzean. Kale garbitzaileetako batek irakurri du idatzia elkarretaratzea amaitzeko. Kale garbitzaile batek jasandako erasoa salatzeko bildu direla bertara esan du, baita erasoek amaitu behar dutela adierazteko.
Izan ere, ez da izan igandekoa kasu isolatua kale garbitzaileek gaur salatu dutenez, “aspaldi sumatu dugu gure herrian batzuek daukaten jarrera desegokia, eta gure kasuan, kale garbitzaileon lanarekiko alegia, herriarekiko eta gizartearekiko errespetua galdu dela nabarmena da. Garai gogorrak bizi ditugu. Pandemia honek, gizarte osoari eragiten dio baina ez dadila aitzakia bilakatu batzuok besteon gainetik pasatzeko”.
Argi esan dute: “Kale garbitzaileoi egokitu zaigun mespretxua jasate horrek amaitu behar du”. Segurtasunez eta bizikidetzaz lan egiteko eskubidea aldarrikatu dute, eta gaur salatu duten jarrerak beren eskubideak urratzen dituela nabarmendu dute.
Erantzukizuna eskatu diete Lezoko kale garbitzaileek, halaber, udal zerbitzu, enpresa zein gizarteari ere, “igandeko gertakaria ekidin zitekeen, eta erantzukizunez jokatzera deitu nahi ditugu”. Elkar zaintzarako apustua lehenestera deitu dute Lezoko herria, gainera, eta irtenbideak, herritik eta herriarentzat izan behar duela aldarrikatu dute. Bildutako guztiei, azkenik, eskerrak eman dizkiete adierazitako elkartasunarengatik.
Salaketa
Erasoa jaso zuen langileak salaketa aurkeztuko duela jakinarazi dute gaurko elkarretaratze horretan, eta haren lankideek, erasoaren aurrean posizionamendua hartzeko eskatu diote Lezoko Udalari. Momentuz, EH Bilduk baino ez ditu gertatutakoaren gaineko adierazpenak egin. HITZAk jakin duenez, adierazpen bateratua onartu dute Lezoko Udalean ordezkatuta dauden alderdi politiko guztiek, baina momentuz, behintzat, ez dute zabaldu.
Joan den igande goizean gertatu zen erasoa. Lanean ari zela eraso zuten kale garbitzailea. Hainbat ostiko jo eta buruan objektu batekin zauria egin zioten. Langileak kalea garbitzen ari zirela zenbait pertsonek garbitutakoa zikintzen ari zirela-eta errespetuz jokatzeko eskatu zien kale garbitzaileak. Iraintzen hasi ziren ondoren, baina langileak bizkarra eman eta lanean jarraitu zuen; une horretan eraso zuten.
Sortutako zauriengatik osasun etxera eraman behar izan zuten langilea anbulantzian. Bertan medikuek artatu zuten eta buruko zauria josi behar izan zioten; hiru puntu eman behar izan dizkiote.
