Pasaia Kayak-ek lehiari berrekingo dio igandean
Ur lasaietako piraguismoko denboraldiko lehenengo proba izango da igandekoa. Iazko martxoan denboraldia eten zenetik ezin izan dute lehiatu.
Maddi Tarragona, iazko Euskadiko neguko txapelketan, helmugan garaile sartzeko zorian. 
Igandean jokatuko da Arabako Legutio herriko Urrunagako urmaelean ur lasaietako piraguismoko denboraldiko lehenengo proba, 2.000 metroko Euskadiko erlojupeko txapelketa. Horixe izango da ur lasaietako piraguismoko lehenengo proba iazko martxoan denboraldia eten zenetik, ezin izan baitzen beste probarik antolatu denboraldi osoan, ezta denboraldi honen hasieran ere.
COVID-19ak eragindako egoera aldakorraren ondorioz, entrenamenduak behar bezala egiteko “zailtasun gutxi-asko handiak” izan dituztela aitortu dute Pasaia Kayak-eko kideek; dena den, “gogotsu eta ilusio handiz” ekingo diote denboraldiari, iaz jokatu ahal izan ziren proba gutxietan erakutsitakoaren ildotik.
Talde osoa mantendu dute pasaitarrek, eta maila ere mantentzea espero dute horrekin batera, zailtasunak zailtasun. Igandeko lehen saioa baliagarria izango da hurrengo probak prestatzeko, nahiz beste klubetako kirolariekin alderatuta non dauden ikusteko. Talde indartsua eta ugari samarra aurkeztuko dute pasaitarrek, martxoaren 7an jokatuko den Euskadiko neguko lineako txapelketari begira.
