[Galeria] Oarsoaldeko emakumeek ahotsa goratu dute Errenteria-Oreretan
Pasaia eta Oiartzungo emakumeak ere bertaratu dira zapi emate ekitaldira. Txalapartaren erritmora, sistemaren biolentzia salatu eta elkartasunerako deia egin dute.
Pasaia, Oiartzun eta Errenteria-Oreretako emakumeak elkartu ziren atzo. 
Emakumeen Mundu Martxaren V. Ekintzak Errenteria-Orereta hartu zuen atzo arratsaldean, txalapartaren erritmora eta Zubi guztien gainetik, elkartasuna erein lemapean. Hiru emakume zutabe elkartu ziren 18:00etan Iztieta pasealekuan: Pasaia, Oiartzun eta Errenteria-Oreretakoak, hain zuzen.
Udalerri bakoitzeko emakume taldeek euren zapiak eraman zituzten atzoko bilkurara, jasotakoak martxoaren 6an -larunbata- Irun eta Hendaia arteko zubian izango den itxiera ekitaldira eramatea baita azken helburua. Ekintza horri dagokionez, Irungo Udalak ez die baimenik eman aurreikusitako nazio ekitaldia gauzatzeko, eta ordez, 11:00etan manifestazio bat egingo dute leku berdinean.
Azken topaketa horren arira, EMM-k eskatu die inguruan edo mugatik 30 kilometroren bueltan bizi direnei -frontera pasa baitezakete horiek- parte hartzeko bertara daitezen. Gainontzekoak, baimena tramitatu ezin badute, euren udalerrietan elkarretaratzeak egitera animatu dituzte.
Oarsoaldeko emakumeek agur beroa egin zieten Iztietan EMM-ko kideei, elkartasuna izanik hizpide nagusi, hori baita, euren arabera, “pertsonen arteko banaketan, hierarkizazio sozialean eta talkan oinarritzen den sistema patriarkal, kapitalista eta arrazistaren aurka egiteko” armarik garrantzitsuena.
Sistemaren biolentzia salatzeko goratu zuten ahotsa, aurka egiten diotenen gain erabiltzen den indarkeria gaitzetsiz: “Nor den bortitza eta nor ez erabakitzen dute, nor den zilegi eta nor ez”. Azken horrekin, gosez edota itsasoan egunero hiltzen diren milioika lagun ekarri zituzten gogora.
Oarsoaldeko emakumeek argi utzi zuten haiek ez direla izango “esklaboen beharrean” dagoen sistemaren konplize. Aitzitik, zapaltzaileei aurre egingo diete: “Mundu martxa honen eredu dugu mundua zeharkatzeko gai den ekimena, erresistentzian gaudenon ahotsak batuz”.
