Oiartzuerazko hitzen erabilera sustatzen hasi dira, era parte hartzailean
'Oiartzungua naz biño...' martxan jarri du Ttur-tturrek, astero hitz edo esamolde bat sustatzeko. Parte hartzaileek sare sozialetara igoko dituzte argazkiak.
'Deus' hitzarekin hasiko da erronka. Ttur-ttur Euskaltzaleon Bilgunearen barruko Oiartzuarren Baitan egitasmoak beste iniziatiba bat abiarazi du gaur bertan. Helburua izango da oiartzuerazko hitzak eta esamoldeak sustatzea. Oraindik erabiltzen hasi ez diren horien artean ohitura sortzea da helburuetako bat.
Aste honetako hitza deus izango da. Ttur-tturretik adierazi dutenez, norbaitek ezer esaten badu, aste honetan deus esaten saiatuko da. “Aldiz, beste batek deus esaten badu”, azaldu dute euskaltzaleen taldetik, hitz hori nola erabiltzen parteka dezake erabiltzaileekin, nahi duen moduan”.
Modu horretan, bertako hitzak erabiltzeko ohitura hartzea da asmoa, herriko hizkera mantentzearen kontzientzia pizteko.
Oiartzuarrek sortutako edukia sare sozialetara igo beharko dute, eta Ttur-ttur etiketatu. Memeak, bideoak, irudiak eta nahi dutena sor dezakete, eta gero Instagramen edota Facebooken partekatu. Bi traol jartzeko ere eskatu dute: #hitzaoiartzueraz eta asteko hitza (#deus, kasu honetan).
