Feminismoan antolatu eta kolektiboki borrokatzeko deia
Martxoaren 8an kalera aterako da mugimendu feminista; hori bai, pandemia testuinguruan ezarritako segurtasun eta osasun neurri guztiak kontu handiz beteko dituzte, bizitzen aldeko hautua lehen lerroan kokatua baitu mugimendu feministak.
Mugimendu feministaren agerraldia gaur. Martxoaren 8an kalera aterako da mugimendu feminista; hori bai, pandemia testuinguruan ezarritako segurtasun eta osasun neurri guztiak kontu handiz beteko dituzte, bizitzen aldeko hautua lehen lerroan kokatua baitu mugimendu feministak. Berme guztiekin, beraz, kalea hartuko dute hamarnaka eta hamarnaka emakumek astelehenean, Martxoak 8, gaur arratsaldean egindako agerraldian argi esan duten moduan, “emakumeon lekua kalean baitago”.
Hiru zubi inguratuko dituzte segurtasun distantziak mantenduta eta lau kolektibok zabalduko dituzte bertatik lau haizetara euren aldarriak: Osakidetzako langile emakumeek, erresidentzietako langileek, etxeko langileek eta pentsiodun emakumeek hartuko dute hitza. Lau kolektibo horiek lehen lerrora ekarriko dituzte asteleheneko protestan.
Mugimendu feministak gogora ekarri du bi urte igaro direla azken greba feministan bizitzak erdiguneratzeko beharra aldarrikatu zuenetik, eta urtebete, antolatu eta borroka feinistara batzeko deia egin zutenetik: “Ordutik COVID-19ak eragindako izurrite testuinguruak, sistema honen dimentsio ezberdinetako krisiak azaleratu ditu, eta ageriago egin du emakumeak izan direla honetan ere zaurgarrienak: zaintza lanetarako lana utzi edo jornada murriztu dutenak emakumeak izan dira, pandemiak gogorren zigortutako sektoreetan gehiengoa emakumea da”.
Dena aldatu, sistema arrakalatu izango da aurtengo Martxoak 8aren leloa. Krisia ez dela pandemiarekin hasi esan dute, “sistema kapitalista, heteropatriarkal, arrazista arrakalatzeko feminismoan antolatu eta kolektiboki borrokan jarraitu behar dugu, bizitzak sostengatzeko ardurak kolektibizatzeko, eta botere harremanak errotik aldatzeko”.
Herritarren osasunaren gainetik, gobernuek kapitala lehenetsi dutela salatu dute gainera, “kaleak militarizatu, abusu polizial eta instituzional arrazistak jasan ditugu, ehunka kide kaleratu dituzte, milaka emakumek lan merkatua utzi behar izan dute zaintza lanengatik, agerian gelditu da Euskal Herrian bertan erabakiak hartzeko ahalmen eza, indarkeria matxistak ez du eteik izan, eta krisialdiak eragina izan du sektore feminizatuetan”.
Euskal Herrian eta Euskal herritik dena aldatzeko lan egiteko konpromisoa hartu du mugimendu feministak, “aurtengo martxoaren 8an ere erdigune eta bazter guztietan mobilizatuko gara, baita Oreretan ere. Osasun prebentziorako neurriek zein mugikortasun mugek mobilizazio erak zailduko dituzte, baina kaleak salaketarako espazio izateko modua bilatuko dugu”.
Zumardi pareko hiru zubietan elkartuko dira astelehenean, aurretik aipatu bezala, segurtasun neurri guztiak bermatuta, eta horren harira, pazientzia eskatu dute, “denon arteko lankidetzan, gure aldarriak ozen entzun daitezen”.
Hitzordua 19:00etan egin dute.
Edozein arrazoi medio, kalera atera nahi ez, baina aldarrikapena egin nahi dutenei, etxeko leiho eta balkoiak bandera, globo, zapi edo oihal moreekin betetzeko eskatu du mugimendu feministak.
