«Gaztetasunetik feminismoa sustatzea, ekarpena egitea dagokigu»
Urtebete pasa da Zirika Neska Gazte Taldea sortu zutenetik. 16 eta 22 urte arteko gazteak biltzen ditu, eta pandemiak eragin badie ere, argi utzi dute ez direla geldirik egotekoak. Eskola Feministak haiei begirako espazioa sortu du lehenengoz.
Alaitz Aguado Zirikako kidea da,
eta neska gazteen txokoan
parte hartzen ari da. Eskola Feministaren barruan, lehenengoz, Neska Gazteen Txokoa sortu dute. Zirika Neska Gazte Taldearentzat zer suposatu du horrek?
Emakumeen Etxera gerturatzen hasi ginen Zirikako taldekideak eta bertako teknikariak Eskola Feministaren barruan tailerrak antolatzen zituztela, berriak programatu behar zituztela eta neska gazteek gure espazioa eta gure tailerrak izatea horren barruan interesgarria iruditzen zitzaiola esan zigun. Taldean hitz eginda, bi proposamen eraman genituen tailerrak egiteko, eta biak txertatu dituzte. Garrantzitsua iruditzen zaigu gu kontuan hartu izana eta oso pozik gaude, urrats handia da. Denok ditugu beharrak, baina uste dut neska gazteok asko ditugula. Horiei erantzuteko balioko du. Gaztetasunetik feminismoa sustatzea dagokigu, ekarpena egitea.
Zenbat denbora daramazue lanean Zirika Neska Gazte Taldean?
Urtebete pasa daramagu lanean. Hasieran lau neska gazte hasi ginen horren gainean hausnartzen; asanblada feminista badagoela baina, gazteak ez ginela bertan ohartu ginen. Beharra sentitu genuen neska gazteak batuko gintuen talde bat sortzeko, eta hasi ginen harremanetan beste neska gazteekin ere. Une honetan bederatzi ari gara talde eragilean. Asanblada feministan ere hartzen dugu parte, neska gazteek badugulako zer esan, eta pentsatu genuelako bertan izan behar genuela; herritarren artetik kopuru esanguratsua osatzen dugu neska gazteek. Antolatu eta mugitzeko beharra sumatu genuen, eta taldea sortzea iruditu zitzaigun egokiena.
Urtebete pasa da sortu zinetenetik, pandemiak bete-betean harrapatu zaituzte zuek ere, baina hainbat dinamika antolatu dituzue.
Pandemiak asko mugatu bagaitu ere, antolatu ditugu hainbat ekintza. Tartean, azaroaren 25ean kedada antolatu genuen eta erantzuna handia izan zen. Otsailaren 14aren harira, berriz, bideo bat egin dugu: San Valenthil. Martxoaren 8ari begira, berriz, ikasle paroa eta manifestazioa egingo ditugu. Aarratsaldean bat egingo dugu mugimendu feministaren deialdiarekin.
Zirikan parte hartu nahi dutenek, zer egin behar dute?
Instagram kontuaren bidez mezua bidaltzea bezain erraza da.
