Datorren astelehenean hasiko dute udalekuetan aurrematrikulatzeko epea
Haur Hezkuntzako 3. mailatik Lehen Hezkuntzako 6.era bitarteko 400 haurrentzako dira udalekuak. Behin betiko izen ematea maiatzean izango da.
Uda iristeko hiru hilabete falta direnean, Oiartzungo udaleku irekietako arduradunak hasi dira haurrei zuzendutako jarduera hori prestatzen. Gaur zortzi —hilaren 15ean, astelehena— irekiko dute aurrematrikulazioa egiteko epea, hilaren 28ra arte.
Haur Hezkuntzako 3. mailatik eta Lehen Hezkuntzako 6. mailara arteko haurrentzako antolatuko dira udaleku irekiak. Haurrek Oiartzunen erroldatuta egon behar dute, edo herriko hezkuntza zentroetako batera joan.
Behin betiko matrikulazioa maiatzean egingo dute, eta, horretarako, nahitaez egin beharko da datozen bi asteetan aurrematrikulazioa.
400 haurrentzako gehienezko edukiera izango dute udalekuek. Aldian aldiko osasun egoerari lotuta egongo dira baldintzak.
Uztailaren 1etik 30era
Udaleku irekiak uztailaren 1etik 30era izango dira. Hilabete osoan parte har daiteke, edo hamabostaldika. 09:30etik 13:30era bitartean izango dira udalekuak.
Abaraxka ludotekak ikasturte osoan lantzen dituen balore hezitzaileak izango dira, eta ongi pasatzea izango da helburua.
Informazio gehiago lor daiteke e-posta bidez idatzita, edo telefono bidez deituta (645 005 496 edo 943 50 64 12). Abaraxka ludotekatik bertatik ere pasa daiteke, astegunetan, 16:15etik 19:00etara.
