Jarduera feministak martxo osoan zehar zabalduko dira
Gaurkoez gain, beste hiru jarduera antolatu dituzte udalak eta mugimendu feministak elkarlanean, 'Bizitzeko borrokan, eraldatzeko martxan' lelopean.
Oiartzungo Feministen Asanbladak eta udalak elkarlanean, martxo osorako egitaraua antolatu dute. Bizitzeko borrokan, eraldatzeko martxan leloa jarri diote hilabete honetan zehar, gaur bertatik hasita, egingo duten ekitaldi sortari.
Gaur, Martxoak 8, bost jarduera egingo dituzte, arratsaldez. Baina egitarauak ez dira gaurko egunera mugatuko. Datozen asteetan beste hiru ekitaldi egingo dituzte (egitaraua, behean).
“Zaintza eta bizitza erdigunean jartzea da helburua. Zaintzak historikoki emakumeen gain egon dira, eta egoera hori nabarmenago geratu da COVID19ak eragindako pandemia honetan”, adierazi dutenez.
Liburu aurkezpen, mahai-inguru zein film emanaldiez gain, gurasoentzako hezkidetza ikastaroa antolatu du udaleko Feminismo Sailak. Hiruna orduko hiru saio egingo dituzte, eta izena emateko epea laster irekiko dutela iragarri dute. Izen emateen hurrenkera errespetatuko dutela jakinarazi dute.
Gaur, Martxoak 8 (Oiartzungo Feministen Asanbladak antolatua)
- 16:30: Mural margoketa eta June Galardiren kontzertua (Ugaldetxon).
- 16:45: Haurrentzako ipuin-kontaketa Lur Kortarekin (Abaraxka ludotekan).
- 18:00: Zer idazten dute emakumeek? irakurketa-tailer feminista Goiatz Labandibarrekin (Manuel Lekuona bibliotekan).
- 18:30: Hitzaldia: Zer izango litzateke zientzia emakumerik gabe? Maialen Galdeano eta Maria Zubiria (udaletxeko areto nagusian).
- 19:00: Film laburren emanaldia (Haurtzaro Ikastolako jantokian).
Hilak 16, asteartea
- Zaintzak: EZINbesteko eta ikusEZIN. Aldaketako gakoak mahai-ingurua, Marina Sagastizabal eta Miren Arangurenekin (udaletxeko areto nagusian, 18:30ean).
Hilak 23, asteartea
- Salda badago! Euskal Herriko V. jardunaldi feministak liburu-aurkezpena (udaletxeko areto nagusian, 18:30).
Hilak 26, ostirala
- Zinegoak LGBT Nazioarteko Jaialdian erakutsi diren film laburren emanaldia (udaletxeko areto nagusian 18:30 eta on-line).
Martxoan zehar
- Gurasoentzako hezkidetza tailerrean izen-ematea.
